200 ka balay makapahimulos sa tubig sa bag-ong atabay sa MCWD
Dugang kabalayan sa Dakbayan sa Lapu-Lapu ang makabaton na unya og way pagkabalda nga suplay sa tubig nga mainom gikan sa Metropolitan Cebu Water District (MCWD) tungod sa paghimo og bag-ong production well sulod sa propyedad sa real estate developer nga Primeworld Landholdings Inc. sa Barangay Agus.
Aron maseguro nga adunay tubig alang sa mga nag-abang sa Primeworld District, usa ka resort-style nga komunidad nga karon gipalambo, ang developer nitanyag sa MCWD sa paggamit sa ilang propyedad alang sa well drilling.
Ang atabay gipaabot nga makahatag og 360 cubic meters nga tubig kada adlaw kon kini i-commission sa Disyembre ning tuiga.
Ang Primeworld sa sinugdan nanginahanglan og mga 160 ka cubic meters nga tubig kada adlaw ug ang sobra nga tubig nga 200 cubic meters ipang-apod-apod sa mga residential area sa duol. Mokabat sa 200 ka balay ang makabenepisyo sa dugang suplay.
Ang donasyon sa lote gihimong opisyal pinaagi sa pagpirma sa usufruct agreement niadtong Hulyo 13, 2022 sa Primeworld District sa Barangay Agus.
Si Acting General Manager Engr. Stephen Yee sa MCWD ug Corporate Executive Officer Nelba Pangilinan sa Primeworld Landholdings Inc. nipirma sa kasabutan uban sa mga opisyal sa duha ka mga partido nga nagsilbing saksi.
Si Pangilinan niingon nga nakig-coordinate usab sila sa MCWD alang sa uban pa nilang mga proyekto sa dakbayan sa Sugbo.
Ang MCWD paspas nga nagsubay sa ilang water sourcing projects aron mapalambo ang serbisyo sa tubig niini.
Makuha usab ang bulto nga suplay sa tubig gikan sa Lusaran karong Septiyembre aron madugangan ang suplay sa tubig sa mga barangay sa Busay, Lahug, Apas, Camputhaw ug Capitol Site.
Ang negosasyon alang sa mga proyekto sa desalination sa tubig sa dagat nagpadayon usab.