Tulisan sa Bohol hugot gipanid-an
Ang Cebu City Police Office (CCPO) hugot nga nagmonitor sa mga notadong tulisan human sa sunodsunod nga mga tulis sa lalawigan sa Bohol sud ning buwana lang.
Ang CCPO wala mokompyansa ug mipahugot sa ilang intelligence monitoring labot sa maong grupo.
Matod ni Police Lieutenant Colonel Maria Theresa Macatangay, information officer sa CCPO, ilang gipalapdan ang ilang pakig-alayon sa publiko uban sa nagkadaiyang mga grupo nga kanunay nga mohatag kanila og impormasyon sa presensya sa mga kriminal.
Usa sa ilang gipangandaman ang posibling pagtabok sa mga tulisan gikan sa Bohol paingon sa Sugbo ug dinhi na usab mangigo sa mga dagkong patigayon.
“Apart sa deployment nato, ang atoang intelligence networks ato pud nga gipahugtan. Kani nag-involve sa various agencies various volunteers who provide us with usual information. Kon dili madakpan, ma-preempt nato ang mga hitabo sa pagpanulis here in the city,” matod ni Macatangay.
Giangkon ni Macatangay nga miabag sila sa pag-monitor sa mga insidente sa Bohol nga tungod niini ilang gipahugtan ang ilang seguridad pinaagi sa pag-deploy sa mga pulis sa kadalanan nga taas ang nahitabong krimen.
Nakita nila ang video sa nahitabong tulis sa usa ka delivery van sa Bohol diin ang mga suspek nga gihulagway sa kapulisan nga way kulba ug dili kini magpanuko sa pagpatay kon mosukol ang iyang biktima.
“Well, if buhaton na nila ngari sa atoang city, we are prepared to address such type of threats accordingly. Kon armed sila, our PNP personnel are likewise armed,” matod ni Macatangay sa Superbalita Cebu.