CHESANYAMA: ‘FARM-TO-TABLE’ CAFÉ
Makahigayon mo og suroy sa Barangay Adlawon, bukirang bahin sa Dakbayan sa Sugbo, ayaw og sipyata ang paghapit sa giila nga eco-tourism farm café ang Chesanyama.
Ang sekreto kon nganong lami ang ilang gidalit nga pagkaon tungod sa mga sagul niini nga direktang gikuha sa ilang gipananom o uma.
Kon buot ninyo nga mapalahi ang inyong dining experience inay sa naandan nga kananan o snack bar sud sa mga establisemento, suwayi ang Chesanyama.
Ang maong café usa ka openair nga kan-anan nga nag-umbaw sa bukid sa Adlawon.
UNSAY PASABOT?
Alang sa kasayuran sa tanan, ang pulong nga Chesanyama naggikan sa Zulu slang o termino ‘Shisa nyama’ nga ang pasabot – sinunog nga karne.
Sa Hinapon ang ‘Shisan’ nagpasabot – local production, samtang ang ‘Yama’– bukid.
Ang tagdumala sa café nakahukom sa paghingalan sa ilang food dining spot sa maong termino tungod kay maoy konsepto sa ilang mga pagkaon nga gidalit diin ang mga sagul direkta nga naggikan sa abot sa ilang mga tinanom.
UNSAY GITANYAG?
Akong sugyot “must-try” ang ilang best seller nga tomato-pesto mozzarella ug ang ilang special lasagna.
Sa kadtong mosayo unya gikutoy ang tiyan kay wa pay timo adunay ‘all day breakfast.’
Naa pud ang “all time Pinoy favorites” nga biko, budbud, puto ug sikwate.
Sa mga coffee lovers di maguol kay nag-serve sab sila og kape ug kon gusto og refreshing drink, naay fresh buko juice.
Aduna say barbeque dish o ‘Braai’ nga nagpasabot nga sinunog nga karne, usa ka South African term sa barbeque.
Sa ilang braai menu adunay Chesan chicken barbeque ug grilled pork belly samtang lakip sa linyada sa ilang dessert adunay panna cotta.
ADVENTURE
Ang maong café naghatag og mga kalihokan alang niadtong nangita og adventure sa kabukiran sa Sugbo.
Kay makasinati mo nga magbaktas, paglangoy sa suba, adunay picnic area, camping, pagsakay sa kabayo, pagduol sa mga hayop sa uma, apan kon di ninyo bet kay kutas alang kaninyo, mahimo rang mag-chill chill sa maong lugar.
Ang trekking mao ang gipasiugda nga adventure sa kalikupan nga mahimo nimong sulayan sa Chesanyama Café diin mahimo silang maghan-ay og guided trek nga magsugod ug matapos sa cafe.
Ang rota naglakip sa pagagi sa mga bungtod ug sapa sa Adlawon.
Ang maong café usa usab ka pet-friendly nga establisemento, diin mahimo nimong dadon ang inyong nga binuhi sa pagpanuroy sa maong lugar.
DUGANG INPORMASYON
Ang Chesanyama nahimutang sa Sityo Bayabas, Barangay Adlawon, Dakbayan sa Sugbo, sa contact number nga 0918-8887168.
Mahimong moduaw sa ilang official Facebook page nga https://www.facebook.com/chesanyamacafe.
Sa mga interesado nga mosuroy mas dali ang rota subay sa Transcentral Highway o gamit og navigation apps aron di masaag sa lokasyon.