Nietes moretiro sa di pa mag-45 anyos: analyst

Sa panahom sa beteranong Filipino boxing analyst nga si Atty. Ed Tolentino, dili matuman ang tinguha ni kanhi four-division world champion Donnie Nietes nga padayong moaway hangtod sa edad nga 45.

Kini basi sa obserbasyon ni Tolentino sa katapusang away sa gitawag og Ahas diin yano kining gilupig ni World Boxing Organization (WBO) super flyweight champion Japanese Kazuto Ioka sa ilang rematch.

Sa wala pa siya nakig -away og balik ni Ioka, ang 40 anyos nga si Nietes nipabuhagay nga kaya pa niyang moaway sa magsunod lima ka mga tuig.

Apan alang kang Tolentino, klaro nga naapektuhan na ang abilidad ni Nietes sa iyang edad.

“He may not make it to 45 years old which was his projection before the Ioka fight. With that performance, he is on a perfight basis right now,” matod ni Tolentino sa interbyu sa Sparring Sessions LIVE nga napatik sa www.abs-cbnnews.com.

“He may not be convinced yet that he is now 40 years old so his next fight would be very critical.”

Si Nietes, kinsa maoy naggunit sa rekord isip Filipino longest reigning world champion, adunay 43-2-6, 23KOs nga rekord.