Wright gustong kuhaon sa Bossing
Human sila yanong gipalagpot sa San Miguel Beermen, 123-93, sa quarter-finals sa Philippine Basketball Association (PBA) Philippine Cup sa Miyerkules sa gabii, Hulyo 27, 2022, ang Blackwater Bossing daling naka-move on ug naglantaw na dayon sa umaabot.
Nagkanayon si head coach Ariel Vanguardia nga mosuway sila pagkuha og hinigong basketbolista alang sa small forward nga posisyon nga sama og kalibre ni Matthew Wright sa Phoenix Super LPG Fuel Masters.
“No excuse. We got beat. We have to move forward. We have to find ways to improve the line-up and deepen our bench,” matod ni Vanguardia nga napatik sa www.spin.ph.
“We are going to look at the line-up, see if we can make some trades. We are going to look at free agents also. We will see.”
Gawas kang Wright, wala pa’y laing nasigpatan nga magduduwa si Vanguardia apan segurado siya kon unsa nga piyesa ang ilang gikinahanglan aron makakombati og insakto.
“Malay mo, si Matthew Wright ibigay sa amin. Puwede namang mangarap,” asoy ni Vanguardia.
Manug-expire na ang kontrata ni Wright sa Phoenix.