BOLTS, HOTSHOTS SEMIS ANG TUYO
Mga duwa karon
3:00 pm- Meralco batok Ginebra
6:00 pm- Magnolia batok NLEX
Mosuway pagtaak sa semi-finals ang Meralco Bolts ug Magnolia Chicken Timplados Hotshots sa ilang pagpakigbatok sa lainlaing kontra karong adlawa, Hulyo 29, 2022 sa Game 2 sa quarter-finals best-of-three series sa Philippine Basketball Association (NBA) Philippine Cup sa Filoil EcoOil Centre sa San Juan, Manila.
Ang Bolts makigharong sa ilang taodtaod nang higpit nga karibal nga mao ang Brgy. Ginebra Gin Kings sa premirong duwa karong alas 3:00 sa hapon samtang ang Hotshots makigsangka sa NLEX Road Warriors sa main game karong alas 6:00 sa gabii.
Sa Game 1, ang Bolts ningmakmak sa Gin Kings, 93-82, nga seguradong nakahatag kanila og dugang kadasig aron humanon og sayo ang series ug wala nay mahitabong deciding Game 3.
Kon modaog ang Bolts karon, hayan modiretso na sila sa semis diin ikaharong nila ang San Miguel Beermen, nga yanong ningdispatsar sa Blackwater Bossing sa quarter-finals.
Nagkanayon si Bolts acting head coach Luigi Trillo nga dili nila usikan kining maong kahigayunan aron makabawos na sila sa Gin Kings sa usa ka series.
Sulod na sab sa upat ka mga higayon nga nagkrus ang dalan sa Bolts ug Gin Kings sa usa ka series diin kanunay nga ningdaog ang Gin Kings.
“They’ve beaten us every series,” matod ni Trillo. “This is just one game, we need one more game. So as much as the guys played well you know what Ginebra’s about. They’re gonna come back hard.”
Taliwala sa ilang dakong kapildihan sa Game 1, malaumon gihapon ang Gin Kings nga molampos ning maong series.
“Obviously they’re doing something that is causing us some problem so we have to try and figure that out,” matod ni Ginebra coach Tim Cone.
Sa laing bahin, ang molampos sa Magnolia-NLEX quarter-finals series mao ang makigharong sa Talk N’ Text Tropang Giga sa semi-finals, nga kombatihon pinaagi sa best-offive series.