P3.5B income sa Kapitolyo sa 6 ka buwan

Moabot sa P3.569 bilyones ang kita sa Probinsya sa Sugbo sa first half sa 2022, mas taas kon itandi sa samang mga buwan sa 2021.

Mao kini ang kinatibuk-ang kita gikan sa General Fund ug Special Education Fund (SEF) gikan sa Enero hangtud sa Hunyo, 2022 base sa giluwatang listahan sa Provincial Treasurer’s Office pinaagi ni Atty. Roy Salubre.

Subay sa datos, mas taas og 34.99 percent ang kita sa 2022 kon itandi sa P2.644 bilyones sa Enero hangtud Hunyo sa 2021.

Matod ni Salubre nga ang nakitang usbaw gumikan sa mga nakuha gikan sa assets sa Probinsya, Internal Revenue Allotment (IRA), ug uban pa.

“Ang atong nakita nga nakadako ta og collection sa mga additional properties ug apil na ana ang infrastructures,”matod ni Salubre sa interbyu sa Hulyo 29, 2022.

Nisaka usab ang koleksyon sa Cebu South Bus Terminal (CSBT) nga niabot og P39.9 milyones, mas taas itandi sa P32.4 milyones sa miaging tuig.

Gawas sa terminal, nakakolekta usab og P90 milyones ang district hospitals, taas kaayo itandi sa P15.605 milyones sa 2021.