4 anyos patay sa dengue

Usa ka 4 anyos nga batang babaye nadugang sa listahan sa mga nangamatay sa dengue sa dakbayan sa Talisay ning tuiga.

Kini ang ang gikompirmar sa pangu sa Talisay City Health Office, Dr. Lino Alanzado, sa interview kaniya sa Hulyo 28,2022.

Matud ni Alanzado nga ang bata lumolupyo sa Barangay Biasong, Dakbayan sa Talisay kon diin ang ilang balay anaa lang likod sa barangay hall.

Ang kamatayon sa bata nihatod ngadto sa upat sa kinatibuk-ang nangamatay sa dengue ning tuiga sa siyudad.

“Medyo ulahi lang gyud ang bata nga nadala sa ospital mao nang wala na gyud natabang,” matod ni Alanzado.

Gipahibawo ni Alanzado nga sa ilang pag-monitor, nagpabilin gihapon ang dakbayan sa Talisay nga dunay taas nga gidaghanon sa mga kaso sa dengue, nga dala sa usa ka matang sa lamok. Ang Barangay Biasong maoy usa labing daghan og mga kaso sa dengue.

Sa pakisusi sa mga health personnel, ang ginikanan sa bata wala nagdahum nga ang iyang anak naigo na sa dengue.

Matod ni Alanzado nga kon duha na gani ka adlaw ang hilanat sa bata, kinahanglan na kining dad-on sa ospital aron mahiling gilayon.