Kaso ni Cortes ‘cold case’ kay kuwang sa mga saksi; CIDG mao nay naghupot niini

Kaso sa pagpusil patay sa kanhi blocktimer nga si Rey Cortes usa ka tuig na ang nakalabay gihulagway sa Cebu City Police Office (CCPO) nga “cold case.”

Buot pasabot niini nga naglisod ang kapulisan sa pagsulbad tungod kay limitado ang nakuha nga mga ebidensiya busa ila na kining gitugyan ngadto sa Criminal Investigation and Detection Group (CIDG)-7.

Matud ni Police Lieutenant Colonel Wilbert Parilla, deputy director for operations sa CCPO, nga ang maong kaso anaa na sa CIDG-7 subay sa naandang proseso.

Nipasabot si Parilla nga kon di pa masulbad ang usa ka high profile nga kaso human sa unom ka mga buwan, ang CIDG na ang mohupot niini ug mopadayon sa imbestigasiyon.

Dugang ni Parilla nga duna man untay nakuha nga persons of interest nga posibleng maoy yawe sa pag-ila sa gunman sa pagpatay kang Cortes, apan matud niya wala motugma sa mga suspek.

“So, far naa na man unta ta ato mga persons of interest apan ang mga ebedinsiya nga na

gathered is insufficient nga matawag nato sila nga suspek. And it will not also warrant in filing of the case kay dili enough ang mga ebidensiya nga atong nakuha against sa kato nga tawo. Mao na nga wala gyud tay na filan nga kaso,” matod ni Parilla.

Ang mga ebedinsiya nga nakuha kaniadto sa CCPO ila nang na-turnover sa buhatan sa CIDG.

Si Kit Matus-Cortes, kapikas sa brodkaster, nisulti sa interbyu sa Superbalita Cebu, nga nagpasalamat siya kay naglihok ang CIDG sa imbestigasyon.

“In fairness pud sa CIDG, nagpadayon man sila sa pagimbestigar hinuon. In fact nag-adto man sila sa balay mga twice na to follow-up the

case,” dugang ni Matus. Iyang giangkon nga sila ubos kaayo og paglaum nga masulbad kiini.

“Honestly murag nahanap na ang among pag laum pero naa man gihapon ang Ginoo, dili gihapon nako nga hingpit nga wagtangon,” matod ni Kit.

Ang pangu sa CIDG-7 anaa pa karon sa official leave ug mao ray makatubag sa dagan sa imbestigasyon.

Si Cortes gibanhigan niadtong Hulyo 22, 2021 sa alas 8:00 pasado sa buntag gawas sa sibyaanang dyRB sa Barangay Mambaling, Siyudad sa Sugbo human sa iyang programa. Unang gidudahan nga “sniper” ang nipusil kang Cortes kay layo ang gigikanan sa buto. Usa sa mga motibo mao ang pulitika tungod kay nailhan siyang hard-hitting radio commentator.

Si Kit, sa iyang bahin, nibutyag nga sa unang anibersaryo sa kamatayon sa iyang bana, usa ka simpleng panagtapok lang ang ilang gihimo uban sa iyang mga anak.

Ang pamilyang Matus kanunay nagpaabot sa hustisya nga makab-ot sa pagpatay sa iyang bana.

Nagpamisa mi didto sa sementeryo dayon naay kaon gamay mao ra. Nag tapok mi didto sa iyang lubnganan.”

Matod ni Kit MatusCortes.