CHO: Kaso sa Covid-19 sa Talisay nag 2-digit
Nahimo na nga 2-digit karon ang ihap sa mga kaso sa coronavirus disease 2010 (Covid-19) sa dakbayan sa Talisay sud lang sa pipila ka adlaw, sumala ni Dr. Lino Alanzado, pangulo sa City Health Office (CHO) sa dakbayan.
Gibutyag ni Alanzado nga niadtong Lunes, Hulyo 25, naa pa sa siyam ka mga kaso sa Covid-19 apan pagka Martes, Hulyo 26, nahimong 10 ang ihap ug sa Miyerkules, Hulyo 27, nisaka ngadto sa 11 ang kinatibuk-ang positibo.
“Increasing man gyud. Days lang gyud ni siya,” matod ni Alanzano nga nahinabi sa Superbalita Cebu sa Hulyo 28, 2022.
Hinuon, base sa maong ihap, layo pa kini sa delikado nga numero subay sa lagda sa Department of Health (DOH).
Apan dugang ni Alanzado, ang nasuta nga nagpositibo sa Covid-19 gikan sa mga pasyente nga nagpa-admit sa tambalanan diin kabahin ang pagpaubos sa RT-PCR o anti-gen test, kadtong nilukat og travel permits ug ang rekisitos alang sa pagsulod og trabaho.
Matod niya, ang frontliners sa Talisay nagpadayon gihapon sa ilang pag-monitor sa kaso sa Covid-19 sa dakbayan kon diin ang contact tracing wala gihapon putla hangtod karon.
Samtang, gipahibawo ni Alanzado nga wala na silay gihimo nga isolation facility ug ang nagpositibo ilang giawhag nga mopaubos sa pagkwarentina sa balay sibo sa mga adlaw nga gitakda alang niini.
Samtang, 90% na sa mga Talisaynon ang napaubos sa bakuna batok sa Covid-19 ug ang Talisay City Health nangabli gihapon sa ilang vaccination center.
Gawas kini sa gipahigayon sa CHO nga pagpamakuna sa barangay nga nakahatag og positibo nga lakang tungod kay mas daghan ang ilang nabakunahan.
“Magpaabot lang gyud mi kon kinsa ang magpabakuna kay dili man ta anang pugson ang usa ka tawo. Ang amoa kadtong gusto magpabakuna lang,” dugang ni Alanzado sa Superbalita Cebu.