Tulisan sa Bohol misukol, patay

Gikompirmar sa kapulisan sa lungsod sa Alicia, lalawigan sa Bohol nga ilang napatay niadtong Huwebes, Hulyo 28, 2022, ang usa sa mga suspek sa sunodsunod nga mga tulis sa mga ahente sa delivery vans.

Gideklarar nga patay sa pag-abot sa tambalanan mao si Victor Igpit Aguilar, 41, taga Barangay Sagasay, lungsod sa Balilihan sa nahisgutang probinsiya.

Si Police Lieutenant Wilson Orapa, hepe sa Alicia Police Station, nagkanayon nga nihimo sila og checkpoint sa national highway sa Brgy. La Hacienda dihang usa ka drayber sa motorsiklo nga walay helmet ilang gipahunong apan daling nisibat.

Apan wala kini nipatuo hinungdan nga gigukod sa kapulisan samtang gipaalarma ang police station sa kasikbit nga lungsod ug ubang units sa kapulisan aron mababagan.

Ang grupo ni Police Lieutenant John Kareen Escober, pangulo sa Provincial Intelligence Unit (PIU), niresponde human nakadawat usab sa taho nga may nakaengkwentro ang kapulisan sa Alicia.

Giingong nahitabo ang engkwentro sa mga pulis tali kang Aguilar sa Sitio Cantugop, Barangay Napo sa nahisgutang lungsod.

Ang mga sakop sa Scene of Crime Operations (Soco) nga niproseso sa crime scene nakarekober og usa ka kalibre .45 nga pistola nga dunay magazine nga wa nay bala, pito ka mga empty shell sa kalibre .45, usa ka empty shell sa kalibre 9 mm nga armas.

Lakip sa gihimong ebidensiya ang motorsiklo nga gisakyan sa suspek, sling bag, pitaka nga dunay sulod nga P5,000 apil na ang usa ka cellphone ug silver nga alahas.

Ang bayhon ni Aguilar nitugma sa usab sa usa sa mga nitulis sa delivery van nga nakuha ang hulagway sa CCTV camera.

Ang namatay kanhi napriso niadtong Abril 1, 2022 tungod sa kaso nga kalapasan sa RA 9165 bahin sa paghupot sa gidiling drugas ug RA 10591 bahin sa illegal nga pagtiner og armas apan nakagawas niadtong Marso 31, 2022.