Cortes pabor sa pagbanhaw sa ROTC
Nipadayag sa iyang suporta si Mandaue City Mayor Jonas Cortes sa pagbanhaw sa mandatory Reserve Officers’ Training Corps (ROTC) alang sa senior high school students.
Kini human giawhag ni Presidente Ferdinand “Bongbong” Marcos Jr. ang Kongreso nga mopasar og balaudnon alang sa mandatory ROTC sa senior high programs ug tertiary level sa publiko ug pribadong tunghaan, lakip sa National Service Training Program (NSTP) atol sa iyang unang State of the Nation Address niadtong Lunes, Hulyo 25, 2022.
Sa interbyu niadtong Miyerkules, Hulyo 27, si Cortes niingon nga iyang nakita ang panginahanglan sa pagsilsil sa disiplina sa mga batan-on.
“We need also to impose things nga angayan ba. Parehas bitaw sa Singapore kana bang ang mga bata, they have to undergo more than ROTC nga training,” matod ni Cortes, nasyonalismo ug disiplina sa kaugalingon wala na gibuhat sa kabatan-onan.
Ang ROTC gihimong opsiyonal niadtong 2002 human sa kamatayon ni Mark Chua, usa ka tinun-an sa University of Sto. Tomas nga giingong gipatay human gibulgar ang mga pasangil sa kurapsyon sa ROTC.
Usa na kini sa tulo ka sangkap sa National Service Training Program, kauban ang Civic Welfare Training Service (CWTS) ug Literacy Training Service (LTS).