Mobile classrooms sa Lapu-Lapu City

Ang Kagamhanan sa Dakbayan sa Lapu-Lapu gikatakdang mopakatap og mga mobile classrooms alang niadtong mihunong sa pagtungha, ilabina taliwala sa coronavirus disease 2019 (Covid-19) pandemic.

Gibutyag kini ni Mayor Junard “Ahong” Chan human sa iyang pakigtagbo sa Local School Board (LSB) niadtong Huwebes, Hulyo 28, 2022.

Si Chan nagkanayon nga ang dakbayan nakapalit na og tulo ka tricycle-type classrooms nga adunay light-emitting diodes television (LED TV) ug mga lingkoranan, ug andam na nga ipakatap sa pagsugod sa school year (SY) 2022-2023 sa Agusto 22, 2022.

Matod sa mayor nga ilang giplanohan nga ipakatap kini sa Isla sa Olango, labina alang sa out-of-school youth o kadtong mihunong sa pagtungha.

Gihatagan niya og gibugaton nga ang mobile classrooms nga mag-atiman sa mga estudyante sa day care ug sa Alternative Learning System (ALS) ug ang mga magtutudlo gi-hire sa Siyudad mao ang mohimo sa klase.

Si Chan niingon nga posibleng dugangan kini og upat ka bus nga himuon usab nga classrooms ug nagplano usab nga mopalit og mga tablet ug computer.