CCPO kinahangla’g abag sa publiko

Ang Cebu City Police Office (CCPO) nitak-op sa usa ka buwan nga pagsaulog sa Police Community Relations (PCR) Month niadtong Huwebes, Hulyo 28, 2022.

Gipasalamatan sa CCPO ang publiko sa pagsuporta sa ilang mga programa pagpakigbatok sa krimen.

Sulod sa usa ka buwan, ang tibuok nasud nisaulog sa PCR diin aduna silay mga programa nga nagsentro sa publiko ug stakeholders alang sa kahusay ug kalinaw sa lokalidad.

Ang tema sa PCR Month karong tuiga: “Ugnayang Pulisya at Komunidad Tungo sa Mapayapa, Maayos, at Maunlad na Pamayanan.”

Matod ni Police Lieutenant Colonel Maria Theresa Macatangay, information officer sa CCPO, kon walay abag sa publiko, mahimong inutil ang kapulisan sa ilang tinguha nga makab-ot ang kahapsay ug kalinaw sa usa ka dapit.

Giangkon ni Macatangay nga dakong hagit kanila sa kapulisan ang paghatag sa seguridad sa publiko tungod sa kadako na sa populasyon sa siyudad sa Sugbo.

Matod niya, ang ratio sa PNP tali sa matag tawo naa sa 1:2,000 tungod sa pagburot sa populasyon sa dakbayan busa kinahanglang abagan usab sila sa katawhan aron makab-ot ang kalinaw ug kahusay.

“Were facing a very big challenge. However, we do not shy away from the challenge but we appeal to you to support your local police. Extend to them whatever help you can because at the end of the day, it is a collective na pagbuhat, collective na pag-atubang aning pag maintain nato sa peace and order ngari sa siyudad sa Sugbo,” matod ni Macatangay.

Nagkadaiyang mga programa ang gihimo sa PNP sa Central Visayas alang sa publiko aron mapaduol ang kapulisan ngadto sa katawhan. /