Frasco miporma og team sa DOT
Ang bag-ong kalihim sa Department of Tourism (DOT) nga si Christina Garcia Frasco nagporma og team nga moabag kaniya sa pagkab-ot sa tumong sa pagbuhi og balik sa turismo sa nasod aron pagtabang sa pagpalambo sa ekonomiya human unya sa pandemiya.
Nag-una sa iyang team mao si kanhi Integrated Bar of the Philippines (IBP) Cebu City president Mae Elaine Bathan, kinsa gitudlo nga undersecretary ug chief of staff sa DOT.
Matod ni Bathan, ang iyang item o posisyon usa ka undersecretary for legal and special concerns, samtang gitahasan usab isip chief of staff.
Matod niya, ang iyang tahas bahin kon unsaon sa pagpadagan sa departamento.
“Corollary to that, as chief of staff, I’ll be an alter ego of the secretary on matters regarding the department. I represent her,” pulong ni Bathan sa SunStar Cebu sa Hulyo 28, 2022.
Dihang gipangutana kon tigpamaba ba siya ni Frasco, si Bathan nagkanayon nga ang secretary walay gitahasan nga tigpamaba busa ang han yo nga interviews modirekta sa secretary.
Sa pagkakaron, ang DOT dunay upat ka undersecretaries, matod ni Bathan.
Gawas kaniya, si Bathan nagkanayon nga naa sila si kanhi Liloan councilor Ferdinand “Kokoy” Jumapao, manlalaban Shereen Gail Pamintuan ug Shahlimar Tamano, kinsa ulahing nadestino isip direktor sa DOT Central Visayas.
Si Pamintuan kanhi nagsilbi isip executive director sa League of Cities of the Philippines.
Si Tamano gitudlo nga undersecretary for regional affairs sa DOT Tourism Regulation, Coordination and Resource Generation, sumala sa Facebook page post sa DOT-National Capital Region nga nipahalipay kaniya sa pagkatudlo sa posisyon.
Matod ni Bathan, ang undersecretaries masilbi usab nga alternate delegates ngadto sa attached agencies ug government-owned and controlled corporations diin miyembro ang DOT, sama sa Mactan-Cebu International Airport Authority, kon ang secretary dili makatambong.
Lakip sa team ni Frasco mao ang kanhi aide sa Liloan nga si Alven Talisic, kinsa pangulo karon sa executive assistant, dason ni Bathan.
Ang SunStar unang nitaho sa team ni Frasco mao si Ronald Conopio, gitudlo nga direktor sa DOT.
Si Conopio nibutyag sa SunStar Cebu nga mangulo siya sa Protocol and Engagements Unit sa Office of the Secretary.
Siya nakatrabaho ubos ni Gov. Gwendolyn Garcia, inahan ni Frasco, sulod sa 15 ka tuig sa nagkalainlaing mga tahas lakip sa panahon nga si Garcia napili nga kongresista.
Nahimo siya nga consultant sa igsuon sa gobernador nga si Pablo John Garcia (Cebu, third district), ug son-in-law, Vincent Franco “Duke” Frasco (Cebu, fifth district) gikan sa 2019.
Si Secretary Frasco nibuhi sa pagka mayor sa Liloan, Cebu dihang gitudlo ni Presidente Ferdinand Marcos Jr. nga mangulo sa DOT.
Ang turismo sa nasod nahunong sa pagsulod sa coronavirus disease (Covid-19) pandemic sa Marso 2020. Ang Pilipinas niabli og balik sa foreign tourists sa Pebrero 10, 2022.