Tulis sa Bohol hulga sa Sugbo

Dili mominos dul-an sa napulo ka mga kaso sa pagpanulis sa lalawigan sa Bohol sud lang ning buwan sa Hulyo. Nag-unang biktima o target mao ang mga delivery van labina kon mobiyahe panahon sa kagabhion. Kadudahan ang mga panghitabo. Dili kaha kini binuhatan sa organisadong grupo o sindikato?

Ang Bohol naila nga malinawomg dapit. Destinasyon sa turismo tungod sa iyang tabunok nga bahandi sa kinaiyahan. Mahigalaon ang Bol-anon. Tungod niini, ang Bohol usa sa malambuong lalawigan sa nasod. Apan ang ulahing balita bahin sa sundosunod nga tulis sa kadalanan, nakaduhig sa iyang imahen.

Maayong masanta kini sa awtoridad. Pagpuhag sa grupo o indibiduwal nga naghimo sa salaud. Samtang, mas mapadali ug malampuson kini pinaagi sa kooperasyon ug pag-abag sa mga yanong sibilyan o lumolupyo sa dapit, sama sa sekretong pagtaho sa awtoridad sa ilang palibot dako na og ikatabang sa kaluwasan sa tanan.

Kini nga matang sa relasyon mas makahuluganon ning panahona nunot sa naghinapos nga pagsaulog sa Philippine Natinoal Police (PNP) sa Police Community Relations (PCR) Month. Ang PNP niila sa dakong papel sa katawhan isip kaabag sa ilang tahas ug responsibilidad sa pagpatunhay sa kahusay ug kalinaw sa lokalidad.

Ug ang pagsiaw sa tulis sa Bohol naghatag og dakong pagpakabana sa Sugbo isip silangang lalawigan ug parehong destinasyon sa turismo. Busa, ang Cebu City Police Office (CCPO) hugot usab nga nag-monitor sa mga tulis sa Bohol ug walay kompyansa. Gikataho nga mas nipahugot sa ilang intelligence monitoring.

Si Police Lieutenant Colonel Maria Theresa Macatangay, information officer sa CCPO, gikutlo sa balita nga usa sa ilang gipangandaman mao ang posibling pagtabok sa mga tulisan sa Sugbo ug dinhi na usab mangigo sa mga dagkong pamatigayon o delivery vans.

Dili ba kaha nia na sila sa Sugbo? Dili kita mokompiyansa. Ang nahitabo sa Bohol dili layong posibilidad nga masinati dinhi sa ato. Maayong masanta dayon. Kaakuhan nato kining tanan nga mahigugmaon sa kalinaw.