WORLD NO. 3 NA SI OBIENA
Misulbong sa No. 3 ang Filipino pole vault Olympian nga si EJ Obiena sa labing bag-ong pole vault world rankings human sa iyang makasaysayanong paglabni og bronze medal sa 2022 World Athletics Championships ning bag-uhay lang sa Oregon, United States.
Gikan sa No. 6, si Obiena miambak og tulo ka mga angang dala ang kinatibuk-ang iskor nga 1408 sunod nila ni world’s best Mondo Duplantis (1612) sa Sweden ug Chris Nilsen (1435) sa US.
Mao kini ang labing taas nga naabot ni Obiena sa world ranking. Nakapatong na siya sa No. 5 kaniadto apan midakin-as kini sa No. 6.
Sa World Championships, si Obiena nakalusot sa 5.94 meter mark nga maoy nagbuak sa iyang kaugalingong rekord sa Pilipinas ug Asya.
HINABANG ALANG KANG LYDIA
Sa laing bahin, nakadesisyon si Obiena nga iyang ihatag isip hinabang ang P250,000 nga iyang dawatunong benepisyo gikan sa Philippine Sports Commission (PSC) ngadto sa Filipina track and field legend Lydia de Vega, kinsa nag-antos sa komplikasyon sa Stage 4 breast cancer.
“I am also here today because I am standing on the shoulders of giants. The legends of Philippines Athletics who paved a way for me. Who brought attention and success to athletics. I owe them a debt of gratitude,” post ni Obiena sa iyang Facebook account nga napatik sa www.gmanews.tv.
“I thank them for the route they have forged for us competing today.”
Gipahibalo ni Obiena nga ang iyang advisor ug nurtitionist nakadesisyon nga tugbangan ang iyang hinabang ngadto kang De Vega. Nagpasabot kini nga moabot sa P500,000 ang hinabang sa Team Obiena.
“In discussing this with my team upon arrival in Italy, I am also pleased to announce that James and Carol Lafferty, my advisor, and my nutritionist respectively, will match my contribution of 250,000 pesos,” dugang ni Obiena.