Mas luwas nga Carbon gipaneguro sa C2W

Naghimo na og mga lakang ang Cebu 2World Devt. Inc. aron maminusan ang mga krimen sa merkado publiko sa Carbon nga sud na sa daghang mga dekada maoy nag-unang suliran sa mga mamalitay.

Si Louie Ferrer, chairman ug presidente sa C2W, sa interbyu niadtong Sabado, Hulyo 30, 2022, niingon nga ilang gihatagan og pagtagad ang suliran sa seguridad sa sobra na usa ka siglong merkado sa dakbayan sa Sugbo.

Matod ni Ferrer, ang seguridad sa mga mamalitay gikan sa gagmay nga mga krimen sama sa pagpanguot ug pagpangawat ilang gihimong tipik sa plano nila sa Carbon.

“It’s a serious concern because it’s one of the top reasons why buyers are not going back (Carbon),” pasabot ni Ferrer.

Sa ilang plano, kon mahuman na ang kinatibuk-ang pagmoderno sa Carbon, dunay lima ka police outposts ang ilang ibutang sa palibot sa merkado.

Ila usab nga palambuon ang Carbon Police Station isip tipik gihapon sa ilang kasabutan tali sa Siyudad.

Sa pagkakaron, duna pay duha ka police outposts nga gimontar, usa naa sa viaduct samtang ang laing usa naa sa sityo Katsilaan, Brgy. Ermita.

Samtang si Lydwena Eco, deputy general manager, sa samang interview, nibutyag nga sulod sa Interim Market, duna silay gimontar nga 87 ka closed circuit television (CCTV) camera, kansang monitor gibantayan og usa ka security officer nga 24/7 nga nagtan-aw niini.

Matod niya, sa pipila ka mga adlaw nga nakalabay, duna nay nadakpan nga mga kawatan ug mangunguot, sukwahi kaniadto nga sayon rang makalusot ang mga kriminal.

Gawas niini, duna silay radio communication, kansang frequency konektado sa Cebu City Transportation Office (CCTO) ug Market Operations Division (MOD) alang sa mas paspas nga pagtubag kon dunay mga problema nga motumaw sa merkado.

Si Ferrer nibutyag usab nga si Mayor Michael Rama nitukod og composite team nga gilangkuban sa CCTO, MOD, Megawide Construction Corp., kapulisan, Probe ug tulo ka mga barangay nga dunay jurisdiction sa Carbon market.

Pinaagi niini, dali rang matuki ug matubag ang mga problema, apil na sa seguridad.

WAY MAHAWA

Si Eco, sa iyang bahin, niklaro nga way bisan usa ka manindahay sa Carbon nga mahawa gikan sa iyang pwesto kay ang tanan patindahon sulod sa tukuron nga merkado kon mahuman na.

Gani, sa unang edipisyo nga sugdan na sa pagtukod sa C2W, makapasulod sila og 2,500 ka mga manindahay, apil na ang ambulant vendors.

Pinaagi niini, wa nay mag-antos sa pagpaninda sa daplin sa mga karsada libot sa Carbon market nga nag-agwanta sa uwan ug init, ingon man baha kon mag-uwan.

Bisan gani ang mga kuramatero magpabilin sa ilang naandang panginabuhi.

Giandaman pa gani kini nila og ilang kaugalingon nga lane diin mamahimo silang adto makahuwat og mga kustomer matag adlaw.

Ila pa kining gihatagan og mga uniporme matag usa.

Busa, si Ferrer naglibog kon nganong dunay gipakatap nga mga estoryang bakak nga di tanan ang makapaninda sa Carbon kay sukad pa sa sinugdanan, ila nang tinguha nga way mahawa o mawad-an og panginabuhian nga vendor.

Bisan gani sa Interim Market, sobra ang stalls nga ilang gitagana kay sa gidaghanon sa naa sa listahan sa MOD sa mga manindahay sa Freedom Park ug Warwick Barracks.

Sa lista sa MOD, dunay 744 ka mga manindahay, apan ang stalls nga ilang gihimo naa sa 767.

Sa pagkakaron, naa naa na sa 450 ka vendors ang aktibong nag-operate sa Interim Market sukad nahuman ang clearing operation samtang duna na say namutang sa ilang mga tinda apan wa pa nag-operate.

DI PRIVITIZATION

Gitataw ni Eco nga di tinuod nga gihimong pribado ang Carbon kay ang ilaha sa Siyudad mao ang “partnership.”

Siya nipasabot nga ang Siyudad maoy magbuot kinsa ang paabangon sa stall ug pila ang abang, nagpasabot nga ang kagamhanan maoy tag-iya sa merkado publiko.

Kini gibase sa Cebu City Market Code nga giaprobahan sa Konseho sa Siyudad.

Wa silay bisan gamay nga gahum nga makabuot kinsa ang makapaninda, samot na ang pagdiktar sa abangan.

Kon pribado pa unta, makabuot sila sa rental rates ug kinsa ang paabangon, dugang ni Eco.

Si Ferrer, sa iyang bahin, naglibog kon nganong dunay mga tawo nga nagsige og estorya nga himuong pribado ang Carbon.

Si Ferrer niingon nga sa ilang mga konsultasyon tali sa tanang vendors sukad pa kaniadto, labina sa ilang mga lider, ila na kining gibalikbalik sa pagpasabot. /

/ ROGER E. VALLENA PRESSCON: Atol sa press conference, sila si (gikan sa wala) Cristina Angan, director, Cebu2World; Louie Ferrer, Lydwena Eco nipasabot bahin sa modernisasyon sa Carbon Public Market, sentro ug labing dako nga merkado sa dakbayan sa Sugbo, ubos sa panag-alayon sa kagamhanan sa dakbayan sa Sugbo ug Cebu 2World Devt. Inc.