Mayor sa duha ka LGUs naghiusa sa 1Cebu

Presensiya sa duha ka mga mayor sa Lungsod sa San Fernando ug Dakbayan sa Carcar namatikdan atol sa panagtapok sa Partido Alayon.

Ang maong mga elected mayor naglakip nila ni Mytha Canoy sa San Fernando ug Patrick Barcenas, Dakbayan sa Carcar nga nailhan nga dili sakop sa Alayon party.

Apan nakita nga aduna nay panaghiusa human nga misalmot ang duha ka mga opisyal sa tigom sa mga mayor sa Unang Distrito sa Lalawigan sa Sugbo.

Sa sayo pa, nag-abot ang tanang mga mayor sa unang distrito sa Cebu Province sa dihang gipahigayon ang State of the Nation Address (SONA) ni President Ferdinand ‘Bongbong’ Marcos Jr.

Si Talisay City Mayor Gerald Anthony Gullas namahayag sa dihang nahinabi sa mga tigbalita nga natapos na ang piniliay ug angayan lang nga ihiklin ang pamolitika ug tutokan ang pagtunol og serbisyo ngadto matag konstituwente.

Gihulagway ni Gullas nga ang nahitabong panagtapok sa mga local chief executive sa kalungsoran ug mga siyudad usa ka timaan sa panaghiusa nga way bulok pulitika.

Si Barcenas nikonpirmar sa maong panagtagbo ug iyang gikalipay ang maong kalambuan ilabi na nga sila nagkaabot ug nagkahiusa.

Gipaambit ni Barcenas nga iyang nahimamat si 1st District Congresswoman Rhea Gullas kinsa misaad nga mosuporta sa mga proyekto alang sa Carcar.