Way forever

Dear Papa Joe,

Tagoa lang ko sa ngan nga Romel, 34 anyos, minyo ug may mga anak.

Tinuod gyud siguro ang panultihon nga maningil gyud ang binuhatang di maayo.

Daghan ko og napaangkan nga babaye apan napasagdahan nako sila kay wa koy katagbawan.

Apan niabot ang babaye nga akong gimahal ug gibuhat ang tanan nga wa nako mabuhat sa akong mga kanhi. Apan, dako akong pagmahay kay giilog ra siya nako sa sitwasyon nga di na nako mabawi pa pag-usab.

Namatay siya sa sakit nga cancer nga kon asa nagtinarong na ko, nawala pa siya.

Unsa ang buhaton ko aron maka move on na ko? Palihug tambagi ko.

ROMEL

Romel,

Dili tuod sayon no? Apan dapat dawaton mo ang tanan kay kanang nahitabo niya di gyud nato mapugngan kay kitang tanan moabot sa ingana nga sitwasyon.

Kon kanus-a, wa ta masayud. Sama sa samad, mawa man ang kasakit, magpabilin ang uwat niini.

Apan wa na mag-ingon nga wa maayo. Mao nga ampo lang kanunay nga madawat nimo ang panghitabo.

Kining nahitabo nimo mamahimong giya sa uban nga di usikan ang panahon nga kauban ninyo ang inyong minahal kay di ta forever ning kalibutana. Mobiya sa tinuyo o natural nga paagi.

PAPA JOE

(sa inyong tampo ipadala lang sa papajoesuperb@ gmail.com)