PUWEDE PA MADAYON
Floyd midugkat og posibilidad sa rematch nila ni Pacquiao
Gidugkatan og balik ni American boxing legend Floyd Mayweather Jr. ang posibleng panagharong nila’g balik ni Filipino great Manny Pacquiao sa ugma damlag.
Niadtong 2020, gipadayag ni Mayweather ang iyang intensyon nga makigsangka pagbalik ni Pacquiao sa Middle East apan nalubog ang tanan gumikan sa pagkuyanap sa pandemiya sa tibuok kalibutan.
Karon nga hinayhinay na nga nibalik sa normal ang sitwasyon, mianunsyo si Mayweather nga nagplano siyang mosagubang og tulo ka mga away sa umaabot lakip na niini ang usa ka professional bout.
Kinsa man ang angayang kontrahon ni Mayweather kon molugnot kini gikan sa pagretiro aron moaway pagbalik sa professional rank?
Alang sa www.worldboxingnews, wala’y laing angayang pilion kon di ang kanhi 8-division world champion nga Pinoy.
Sa premiro nilang away niadtong 2015, midaog si Mayweather pinaagi sa unanimous decision apan aduna kini question mark tungod kay nakasinati og angol ang Pambansang Kamao ng Pilipinas sa tungatungang bahin sa away.
Ang premirong away ningbuak og daghang rekord sa boksing hilabi na sa pinansyal nga aspeto.
Sama ni Mayweather, si Pacquiao miretiro na sab apan gituohang moaway kini’g balik sa professional rank hilabi na kon si Mawweather ang kontra.
Si Mayweather nag-edad na og 45 samtang si Pacquiao nag-edad og 43 apan alang sa WBN, pareho pa kining adunay ikabuga.
Alang sa WBN, kinahanglang madayon ang rematch samtang kaya pa sa duha ka boxing superstars nga moaway sa taas nga kalidad.