Garcia nasubhan og daog sa jr. middleweight

Nasubhan og majority decision nga kadaugan si American Danny Garcia sa pagsaka niya og timbang kagahapon, Hulyo 31, 2022 (RP time) batok sa kababayang si Jose Benavidez Jr. sa Barclay’s Center sa New York.

Sa labing una niyang away sa junior middleweight, midaog si Garcia sa duha ka judges, 116-112, ug 117-111, samtang tabla sa usa, 114-114.

“I did take a break. You know, I was going through some mental things. I felt a little dark. You know, I went through a little,” asoy ni Garcia nga napatik sa www.boxingscene.com.

Nakuha ni Garcia ang kadaugan bisan mao kini ang labing una niya human siya nasugamak sa unanimous decision nga kapildihan batok kang unified welterweight champion Errol Spence Jr. niadtong Disyembre, 2020.

Si Garcia, kinsa kanhi world champion sa junior welterweight ug welterweight divisions, nisaka sa 37-3, 21KOs nga rekord samtang si Benavidez nahagbong sa 27-2-1, 18KOs nga baraha.