YAP MODUWA BALIK SA PBA
Gibutyag ni Philippine Basketball Association (PBA) commissioner Willie Marcial nga moduwa og balik sa Rain or Shine Elasto Painters sa sunod komperensya ang kanhi 2-time MVP nga si James Yap.
Si Yap wala niduwa sa miaging season tungod sa iyang pagdagan sa eleksyon niadtong Mayo, 2022 diin midaog siya isip konsehal sa San Juan City.
“Maglalaro si James Yap and sabi niya sa akin, by next conference. Ang sinabi niya sa akin, may usapan na sila (ng Rain Or Shine),” batbat ni Marcial nga napatik sa Spin.ph.
Matod ni Yap, wala dayon siya nakadesisyon nga mobalik og duwa pagkahuman sa eleksyon gumikan kay sulod sab sa siyam ka mga buwan nga wala siya nakaduwa.
Gipasabot ni Yap nga nagpakondisyon siya og balik ubos sa paggiya ni Italian football trainer Alfredo Vergori.
“Hindi ako babalik kung alanganin condition ko. Medyo matagal rin akong walang laro, nine months,” batbat ni Yap.
Sa sayo pa, ang Rain or Shine management nipadayag nang daan nga angayan lang han-ayan og tribute si Yap sa dili pa kini hingpit nga moretiro sa PBA.
Si Yap nasulod sa PBA isip No.2 overall pick sa Purefoods franchise niadtong 2004.
Taodtaud sab nga nagduwa si Yap sa Purefoods sa wala pa kini nabalhin sa Rain or Shine niadtong 2016.
Sulod na sa pito ka mga higayon nga nahimong kampyon si Yap, tanan nahitabo dihang nagduwa pa siya sa Purefoods.
Daghan na sab awards nga nadawat si Yap lakip na niini ang upat ka Finals MVP.