Giingong ‘tolets’ gipatay sa ig-agaw

Usa ka 36-anyos nga ex-convict nipusil-patay sa iyang ex-convict nga ig-agaw sa Barangay Bulasa, Argao, Cebu sa Dominggo sa gabii, Hulyo 31, 2022 tungod sa giingong pagpangintriga nga siya nanguyab og minyo.

Si Corporal Ariel Conde, imbestigador sa Argao Police Station, niila sa suspek nga si Macario Cambarijan, alyas`` Dong Gamay”, samtang ang biktima mao si Ulysses Gervise, 38.

Si Conde nitug-an sa SunStar Cebu, nga ang suspek ug biktima mga ex-convict ug giingong parehong di maayo og record.

Matod ni Conde nga si Gervise nakigsulti sa iyang usa ka silingan sa mga alas 6 sa gabii, niabot si Cambarijan aron pagkomprontase sa biktima.

Giingong nasuko si Cambarijan sa iyang ig-gaw kay giingong gipanabi siya nga nanguyab og minyo.

“Nikalit ug duol ni ang suspek 2 meters distance ug giingnan ang biktima nga ‘ayaw pataka og panabi nga karelasyon nako nang bayhana.’ Dayon nikalit og kuha sa iyang pusil, kaduha tumong sa ulo pero wala nibuto,” asoy ni Conde.

Sa ikatulong pagsulay og kablit , nibuto kini ug naigo si Gervise sa wala nga mata.

Human napusilan, si Cambarijan niduol sa iyang ig-agaw nga natumba ug gigakos aron mangayo og pasaylo, dayon niikyas.

Gidala ang biktima sa Isidro C. Kintanar Memorial Hospital apan gideklarar nga dead on arrival sa nag-atiman nga doktor.

Matud ni Cecilio, amahan sa biktima, desidido sila nga pasakaan og kaso ang iyang pag-umangkon.

Matud pa ni Conde nga gipalawman nila ang ilang imbestigasyon kay alang nila mabaw ra ang gitumbok nga rason sa pagpatay.

Sa pagsuwat ning taho, wa pa madakpi si Cambarijan.