Greenhouse farm sa Consolacion
Ang lungsod sa Consolacion sa amihanang Sugbo nilusad sa labing unang greenhouse farms nga adunay hydroponics system, niadtong Biyernes, Hulyo 29, 2022.
Si Nelia Valle, municipal agriculturist, nitug-an sa SunStar Cebu sa Sabado, Hulyo 30, nga ang proyekto dugay na nilang gipasiugdahan niadtong 2021, diin matud niya nag-una nga tumong ang pagpalambo sa agrikultura ug pagbag-o sa produksiyon sa pagkaon sa munisipyo.
Ang mga umahan nahimutang sa Barangay Polog ug Nangka.
Ang hydroponic farming usa ka sistema sa pagpananom nga way yuta. Ang mga gamit sa tanom nga motubo sa usa ka likido nga solusyon sa sustansya o sa sulod sa basa nga mga materyales sama sa Rockwool ug Vermiculite.
Matud ni Valle nga ang maong proyekto hiniusang koordinasyon tali sa Kagamhanan sa Lungsod ug sa lokal nga asosasyon sa mga mag-uuma sa Consolacion ug nahimong posible sa pag-abag Department of Agriculture (DA) Central Visayas.
GREENHOUSE
Matud ni Valle, ang proyekto kabahin sa stimulus package nga gisugyot sa DA ubos sa Bayanihan to Recover as One Act o Republic Act 11494 nga nagtumong sa pagpadali sa pagbangon ug pagpalig-on sa ekonomiya sa nasod ug pagsuporta sa urban agriculture.
Uban sa sistema sa hydroponics, ang produksiyon gipadako aron magamit ang lugar. Maayo usab kini sa bahin sa irigasyon sa tubig kon itandi sa tradisyonal nga pagpanguma ug gipasalig nga ang mga produkto 100 porsyento nga libre sa mga kemikal sa pestisidyo, dugang ni Valle.
Matod ni Valle nga personal silang mi-apply sa maong programa atol sa termino ni kanhi Consolacion mayor Joannes “Joyjoy” Alegado niadtong unang quarter sa miaging tuig.
Ang DA nag-download og mga P2 milyunes nga pundo nga gihatag ngadto sa munisipyo niadtong Hunyo 2021, diin ang Kagamhanan sa Lungsod migahin og mga P50,000 alang sa pagbansaybansay sa pag-uma ug abagahon ang mga dapit diin gihimo ang proyekto, matud ni Valle.