Babaye nga ‘carnapper’ nadakpan

Babaye nga gihulagway nga apil sa sindikato sa pagpangarnap og mga motorsiklo sa kalungsoran sa Bohol nadakpan pinasikad sa warrant of arrest.

Si Police Executive Master Sergeant Dominador Ungab sa Albor Police Station nga nahinabi, niila sa nadakpan nga si Caren Añana, 34, taga Barangay Pasanan, lungsod sa Inabanga.

Matud ni Ungab nga si Añana gidakop sa iyang mga kauban sa alas 9:30 sa buntag niadtong Sabado, Hulyo 30,2022, sa

Purok 4, Barangay Guinobatan, lungsod sa Trinidad, Bohol.

Dugang ni Ungab, ang dinakpan dunay kaso nga kalapasan sa RA 10883 kun New Anti-Carnapping Law of 2016 nga may piyansa nga P300,000.

Si Judge Sammuel Biliran sa Regional Trial Court (RTC) Branch 57 sa lungsod sa Loay maoy niluwat sa warrant.

Nasayran sa Albor Police Station nga ang akusado duna nay warrant of arrest nga giisyu sa Branch 57 ug duna pay laing warrants of arrest nga padung pa i-serve sa dinakpan.

Ang ilang modus, matud sa sa kapulisan, ang grupo manguha og motorsiklo ug ang motorsiklo nga ilang dala maoy ibilin. Dayon ang kinawat dalhon sa lugar kon asa pwede makuhaan og accessories.

Sumala sa kapulisan, kon mahuman na sa grupo sa paghimulbol ang motorsiklo, mao na usab kini ang ilang gamiton sa pagpangita og laing biktimahon ug ibilin na usab sa dapit kon asa nga lugar sila makakita og laing kawaton nga motorsiklo.

Ang gibiktima sa grupo ni Añana nga taga Albor maoy nipasaka og kaso batok kaniya samtang ang motorsiklo niini didto na napalgan sa laing lungsod.