50% sa 129K ka tinun-an sa Lapu-Lapu na-enroll na

Dul-an sa 50 porsiyento sa 129,000 ka gibana-banang gidaghanon sa mga tinunan ang naka-enroll na sa pribado ug publikong mga tunghaan sa dakbayan sa Lapu-Lapu sulod sa usa ka semana.

Si Maria Mitze Zagales, senior education program specialist-planning and research sa Department of Education (DepEd)

Lapu-Lapu City Schools Division, nitug-an sa SunStar Cebu nga mokabat sa 49.25 porsiyento o 63,537 ka mga tinun-an ang naka-enroll sugod sa alas 10:00 sa buntag niadtong Lunes, Agusto 1, 2022.

Si Dr. Wilfreda Bongalos, DepEd Lapu-Lapu City Division superintendent, sa sayo pa, niingon nga ilang gipaabot nga mokabat og 110,000 ug 19,000 ka mga enrollees sa pampubliko ug pribadong tunghaan, matag usa.

Matud ni Zagales nga 49,817 sa 63,537 ka mga tinun-an ang nagpa-enroll sa mga pampublikong tunghaan samtang 13,720 sa mga pribadong tunghaan.

Matod niya 33,578 niini ang nagpa-enroll sa kindergarten hangtod grade 6, samtang 17,197 sa grade 7 hangtod 10 ug 12,762 sa grade 11 hangtod 12.

Ang dakbayan sa Lapu-Lapu adunay dul-an sa 81 ka mga pampublikong tunghaan, 44 niini elementarya; 27 ug 10 mao ang junior high ug senior high school, matag usa.

Si Bongalos nagkanayon nga ang tanang 70 ka mga pribadong tunghaan sa dakbayan mopatuman sa limitado nga face-to-face nga klase sa pag-abli sa klase karong umaabot nga Agusto.

Kini nidugang nga ang uban nagsugod na sa blended learning niadto pang Hulyo.

Ang enrollment nagsugod sa Lunes, Hulyo 25, ug matapos sa Agusto 22, diin mao usab ang pagsugod sa mga klase.