Layo pa ma ‘Singapore’

Tinguha sa administrasyon ni Mayor Michael Rama nga mamahimong susama og Singapore ang Dakbayan sa Sugbo. Maanindot ang target apan tungason pa kaayo kini, labina kon hisgutan ang mga imprastraktura, kalikupan ug kalimpyo sa palibot, apil na ang disiplina sa mga lumolupyo.

Di na lang una kab-uton ang pagka financial hub sa Singapore kay samot nang layo kaayo pa ni makab-ot. Ang unang tan-awon ang kalikupan, sama sa kasapaan. Malambuon na ang Singapore niadtong dekada 70, apan ang ilang kasapaan grabe kahugaw. Busa, niadtong 1977, gipasiugdahan ni anhing Prime Minister Lee Kuan Yew ang paglimpyo sa ilang kasapaan. Paglabay sa 10 ka mga tuig, nabuhi og balik ang kasapaan.

Kon ang paglimpyo karon sa kasapaan sa Dakbayan sa Sugbo magpadayon, kanang igo rang manguha sa mga basura apan way klarong programa, idlas pa kaayong makab-ot ang target sa mayor sa paglimpyo sa kasapaan.

Gikinahanglan ang klarong programa nga dunay direksyon, sama sa gibuhat karon sa dakbayan sa Mandaue nga paglimpyo sa ilang duha ka mga sapa, Butuanon ug Mahiga, aron kini mabuhi. Dalaygon kaayo ang mao nga programa kay naglakip kini sa paghawan sa mga informal settler ug pagtukod og mga pinuy-anan nga ilang kabalhinan sud sa lima ka tuig.

Ang mga nagpuyo daplin sa kasapaan maoy labing dako nga contributor sa kahugaw. Kon sila haw-ason ug tagan-on og kapuy-an, dako kining ikatampo sa pagpanglimpyo. Kadtong mga negusyo nga nakababag ug naglabay sa ilang hugaw sa kasakapaan, kinahanglan silutan. Laing angay nga tutokan sa mayor mao ang pagpang-ayo sa mga karsada. Karon, hinay pa sa bao ang Dept. of Public Works and Highways (DPWH). Paspas diay makaguba, hinay makaayo.

Bisan kani lang duha ang unahon sa mayor, apil na diay ang hustong paghipos sa mga basura, dunay gamay nga dagway nga masusama og Singapore ang Cebu City.