Lee mapasigarbuon sa paglambo sa Shaabaa

Gisugat og kasadya ug kadasig ang pagsugod sa ika25 nga season sa Sacred Heart Ateneo Alumni Basketball Athletic Association (Shaabaa) niadtong Sabado, Hulyo 30, 2022, sa Sacred Heart Heart-Ateneo de Cebu campus sa Canduman, Mandaue City.

Niini, kahingawa ug garbo maoy gibati sa usa sa mga orihinal nga nagpasiugda ning maong lega nga si Richard Lee, kinsa maoy pinasidunggang dinapit sa pagsugod sa kompetisyon.

“First, we started this with five teams only. Maglisod pa gani mi ato pagpangita og teams. Then, lipay na kaayo mi nga nakaabot mi og ten teams,” balik saysay ni Lee, kinsa migahin og igong panahon uban sa iyang pamilya pagtambong sa maong kalihukan.

Kon unsa ang ilang nasinati kaniadto, dako na kaayong sukwahi sa iyang nasaksihan.

“We did not expect this. Almost 30 teams na ang mi-participate,” dugang ni Lee. Ang kahingawa ni Lee masabot nga aduna kini pataban nga pasalamat sa mga opisyal nga nagsunod kanila nga nakahatag usab og maayong pag-amuma sa lega.

Sa opening ceremony, ang Shaabaa President nga si Kevin Bling Lim mipalanog sa ilang pagmugna sa “SHAABAA Cares,” usa ka charitable cause kansang tumong ug katuyoan gipunting ngadto sa retiradong mga maestra ug staff sa SHS-AdC.

Gipasabot ni Lim nga ang Shaabaa mo-donate og P25 sa kada three-point shot nga mahimo sa tibuok torneyo.

Ang lega gisalmotan og 27 ka teams nga gibahin ngadto sa tulo ka kategoriya.

“If the entire league produces a thousand three-point shots, then SHAABAA will put P25,000 for the fund-raising,” dugang ni Lim.

Gawas niini, ang Shaabaa aduna usay emergency funds alang sa komunidad, ilabi na sa mga maestra ug mga faculty staff alang sa medical ug burial assistance.