PB mosusi sa kamatayon sa taga Balamban sa ospital

Gimando sa Hunta Probinsyal ang pagpaubos sa imbestigasyon sa kamatayon sa usa ka lalaking residente sa Sitio Laray, Barangay Biasong, lungsod sa Balamban, probinsya sa Sugbo tungod sa pasangil nga gihikawan sa serbisyo sa Balamban District Hospital niadtong Hulyo.

Ang imbestigasyon nalatid sa resolusyon nga gipangamahanan ni Bokal John Ismael Borgonia sa tersero distrito atol sa sesyon sa Agusto 1, 2022.

Matod ni Borgonia nga angay nga sutaon ang hinungdan kon nganong namatay si Jolibert Canillo, 27, nagpuyo sa naasoyng dapit.

Subay sa nasayran sa usa ka Facebook post sa usa ka Baby Mornic Tadefa, asawa ni Canillo, apan wa maggamit sa tinuod nga ngan sa iyang social media account, siya niasoy sa nahitabo sa iyang bana sa ospital human nakaligis og iro samtang nagmotorsiklo.

Iyang gihulagway nga “nagexcessive bleeding” ang iyang bana, apan asoy sa asawa nga imbis nga atimanon, giingong gipailawom una sa x-ray ug gipapauli samtang gipahuwat sa resulta. Gihinloan hinuon ang samad niini pinaagi sa alcohol.

Subay niini, gusto sa Hunta Probinsyal nga mahatagan og katin-awan ang hitabo pinaagi sa imbestigasyon nga himuon.

“Atoang sutaon ang kamatuoran ug atoang panghinaot nga ang mga sama ani nga mga insedente malikayan ug dili na mausab tungod kay ang kinabuhi bililhon ug ang ospital usa ka lugar diin kita modagan aron ayohon o luwason kita sa peligro ug dili mahiagoman sa kamatayon sama ani,” matod ni Borgonia.