Delivery rider biktima sa scam sa 'seller, buyer'

Di angay mokompiyansa karong panahuna kay daghang modus sa mga pagpangilad sa online.

Niadto lang Dominggo, Hulyo 31, 2022, nireklamo sa Mabolo Police Station sa Cebu City Police ang usa ka rider sa Maxim human nailad sa nagpakaaron ingnon nga kustomer ug kunsabo niini nga seller.

Ang usa sa duha nagpakaaron ingnon nga seller og helmet nga balor og P3,800 samtang ang usa kunohay maoy buyer.

Asoy ni Cesar Pilapil, 37, taga Barangay Hipodromo, Siyudad sa Sugbo, delivery rider, sa Superbalita Cebu nga siya nidawat sa order sa usa ka lalaking kustomer nga kunohay mopalit og helmet.

Tungod kay sa iyang tan-aw lehitimo ang maong kustomer, iya kining gidawat ug gibayran sa kantidad nga P3,800.

Iyang gikuha ang helmet gikan sa usa ka giingong seller sa J. Alcantara St. sa Barangay Mabolo sa samang adlaw niadtong Dominggo.

Ang kunohay nga kustomer nagpaabot usab sa Barangay Sambag. Dunay delivery charge nga kapin sa P200 ang mabayran sa nag order dugangan pa sa kantidad nga P3,800 sa helmet kon mahatud na sa rider.

HAIN KA?

Apan dihang niabot na si Pilapil sa lugar nga ilang gikasabotan, wala mopatim-aw ang buyer ug dihang gitawagan di na makontak ang numbers sa duha.

Tungod niini, nagtuo si Pilapil nga siya naigo sa modus ug nagduda nga managkunsabo ra ang duruha.

Dali siyang nisumbong sa iyang manager ug kapulisan aron mailhan ang duha.

Ang head manager sa Maxim nga si Christopher Poliran, uban ni Pilapil, nisuway sa pagsubay kon kinsa ang tag-iya sa number nga gigamit sa nag-order sa helmet tungod kay dili makita sa ilang system ang numero.

Sa ilang pagsusi og maayo, ilang nasubay nga kanhi rider sa Maxim ang cell phone nga gamit sa kustomer nga gituohang nangilad.

Si Henry Harold, 33, human gipahibawo sa iyang igsuon kalabot sa insidente, dali nga niadto sa estasyon sa pulis aron paglimpyo sa iyang ngalan. Giangkon ni Harold nga tinuod ang iyang cell phone ang gigamit sa pag order apan lahi nga sim ang gigamit.

Nitataw si Harold nga wala siyay kasayuran nga gigamit na diay sa dautang buhat ang iyang cell phone.

Si Harold nga nahinabi sa Superbalita Cebu nibutyag nga wala siyay kasayuran nga gigamit na diay ang iyang cell phone sa binuang. Iyang giangkon nga iyang higala ang nigamit sa cell phone apan dili sila suod.

Nisugot siya nga gamiton ang iyang cell phone kay pananghid kaniya sa iyang higala nga way app nga Maxim ang iyang cell phone aron unta pag-order online.

Dugang ni Harold nga niadtong Dominggo sa gabii gipainom pa siya sa nanghuwam sa cell phone ug kadlawon na siya nakauli tungod kay nahubog apan wala nagtuo nga maangin siya sa kaboang sa iyang giila nga higala.