PBA SEMIS SUGDAN

Mga duwa karon:

3:00 pm- Magnolia batok Talk N’ Text

6:00 pm- San Miguel batok Meralco

Sugdan karong adlawa, Agusto 3, 2022, ang duha ka mga best-ofseven semi-finals series sa 2022 Philippine Basketball Association (PBA) Philippine Cup sa Smart Araneta Coliseum sa Manila.

Sa premirong duwa, magsangka ang Talk N’ Text (TNT) Tropang Giga batok Magnolia Chicken Timplados Hotshots sa alas 3:00 sa hapon.

Mag-engkuwentro sa main game ang San Miguel Beermen batok Meralco Bolts karong alas 6:00 sa gabii.

Ang Beermen, nga nakahipos na og siyam ka All-Filipino titles ug 27 sa kinatibuk-an, makonsiderar nga inilog batok sa Bolts, nga wala pa sukad nakataak sa Philippine Cup finals.

Apan wala kini nagpasabot nga wala’y dag-anan ang Bolts hilabi na kay taas ang moral niini human nila nadispatsar ang Brgy. Ginebra Gin Kings sa quarter-finals series nga miabot og deciding Game 3.

Mao kini ang labing unang higayon nga ninglampos ang Bolts batok sa Gin Kings sulod sa pito ka mga higayon nilang panag-abot sa usa ka series.

Gawas niini, gipangbuntog sab sa Bolts ang Beermen, 89-86, sa ilang panagharong sa elimination round niadtong Hulyo 17, 2022.

Alang sa Bolts, nga wala pa nakabaton og kampyunato gikan sa ilang pagsulod sa PBA niadtong 2010, ang ilang kahidlaw maoy nakahatag kanila og dakong kadasig nga lumpagon ang lig-ong haligi sa Beermen.

“Meralco’s never been to the finals in the all-Filipino so we can use that as motivation. We recognize that we still have more history that we can make,” matod sa usa sa mga pambato sa Bolts nga si Chris Newsome nga napatik sa www.pba.ph.

“We go over the hump against Ginebra but it’s just one step. There’s another goal that we haven’t reached yet, which is getting to the (all-Filipino) finals.”

Sa laing bahin, kulbahinam sab nga engkuwentro ang gituohang masaksihan sa panagtagbo sa Tropang Giga ug Hotshots.

“It’s gonna be a dogfight,” matod ni Hotshots coach Chito Victolero. “Magandang matchup kasi both teams halos pareho style. Defensive mindset, pressure defense, kasi guards nila pesky din.”

Sa ilang panagsangka sa elimination round niadtong Hunyo 5, 2022, gipanglupig sa Tropang Giga ang Hotshots, 78-72.

/ PBA.PH ■ SEMIS. Gihansakan ni San Miguel Beermen center Mo Tautuaa ang iyang kaparang sa Meralco Bolts nga si Raymond Almazan sa panagharong sa duha ka mga kampo sa elimination round sa 2022 PBA Philippine Cup. Karong gabii, magsangka og balik ang duha ka mga kampo sa pagsugod sa ilang semi-finals series.