SuperBalita Cebu

BRT package 1 sugdan sud sa 100 ka adlaw

-

Gipaabot nga masugdan ang pagtukod sa Package 1 sa Cebu Bus Rapid Transit (BRT) project sulod sa unang 100 ka adlaw ni Presidente Ferdinand Marcos Jr.

Sa report gikan sa Cebu City Public Informatio­n Office Martes, Agusto 2, 2022, ang Department of Transporta­tion (DOTr) kasamtanga­ng nagsusi sa mga dokumento sa tulo ka bidders alang sa proyekto.

Ang Package 1 naglakip sa Osmeña Blvd., gikan sa Cebu Provincial Capitol ug paingon sa Cebu South Bus Terminal (CSBT) sa may N. Bacalso Ave.

Si Engineer Roberto Varquez, BRT focal person sa dakbayan sa Sugbo, niingon nga nagpaabot sila sa report gikan sa special bids and awards committee sa DOTr.

Matod ni Varquez, gusto ni DOTr Secretary Jaime Bautista nga ma-award ang proyekto sa makadaog nga bidder sulod sa unang 100 ka adlaw ni Marcos Jr.

Gihisgotan ni Marcos Jr. sa iyang unang State of the Nation Address ang pagpatuman sa BRT ug paghatag og prayoridad sa pagtukod og railway system sa Sugbo.

Ang bidding alang sa Package 1 sa proyekto, nga nagkantida­d og mga P1 bilyon, nagsugod niadtong Mayo 2022. Lima ka interesado­ng kontraktor ang miapil sa bidding apan duha ang gideklarar nga unqualifie­d base sa ilang mga dokumento.

Matud ni Varquez nga sa higayon nga mahatag na ang notice to proceed sa makadaog nga bidder, ipatuman dayon ang civil works alang sa proyekto.

Apil na niini ang pagtukod og upat ka bus stations nga mahimutang sa Cebu South Bus Terminal, Cebu Normal University, Fuente Osmeña, ug Cebu Provincial Capitol.

Sa miaging Hunyo ning tuiga, adunay kinatibuk-ang 228 ka mga kahoy ang na-earthball sa rota sa Package 1 sa proyekto.

Ang mga opisyal sa BRT project niingon nga gikinahang­lan ang earth-balling sa mga kahoy nga nahimutang sa center island sanglit ang mga dedicated lanes alang sa mga bus ibutang didto.

Ang project implementa­tion unit (PIU) sa Cebu BRT nagsugod na usab sa ilang inisyal nga preparator­y activities alang sa Package 2 sa proyekto.

Ang package 2 sa BRT gilangkuba­n sa mga rota gikan sa South Road Properties (SRP) paingon sa CSBT ug laing rota gikan sa Kapitolyo paingon sa IT Park sa Barangay Lahug.

Ang package 3 naglakip sa mga rota gikan sa Talisay City paingon sa Barangay Mambaling, Talisay City paingon sa SRP, ug IT Park paingon sa Barangay Talamban.

Newspapers in Cebuano

Newspapers from Philippines