SuperBalita Cebu

Maangin sa Virgin Island

-

Nag-viral ang gibayad sa usa ka grupo sa lokal nga mga turista nga nangangaon og seafoods sa Virgin Island, Panglao, Bohol tungod sa ka mahal sa presyo sa mga pagkaon nga ilang gi-order. Ang nakunsomo sa 13 ka mga turista kay P26,100. Nagpasabot nga nag-average og P2,000 kada usa nila.

Nakaaghat gud ni og pagsusi sa mayor sa Panglao ug nakakuha og atensyon bisan mismo sa Department of Tourism (DOT) ug Dept. of Environmen­t and Natural Resources (DENR).

Sa bayranan lang gud sa saging, naa sa P900 ang tanan. Nadungog na hinuon nga dunay daghang mamaak sa presyo sa mga turista sa Bohol, lokal man o langyaw. Apan ingon sa way gihimong aksyon ang mga local government unit (LGU) niini. Unta aksiyunan ang mga ing ani kay makadaut kini sa dungog sa lalawigan sa natad sa turismo.

Malambuon ang Bohol tungod sa turismo nga nagdala og income bisan sa mga negusyo nga di related niini. Liboan ang gustong mobisita sa lalawigan tungod sa kaanindot sa iyang mga talan-awon ug kadagatan. Apan mao lagi, duna gyuy mga mapahimusl­anon sa kahigayuna­n nga maoy makadaut sa kinatibuk-an sa industriya.

Gimbuhaton sa matag LGU, lungsod o siyudad, ang pag-atiman sa unsa may iyang labing dako nga tinubdan sa panalapi. Kon turismo ang iyang dako nga industriya, iya kining atimanon. Sa Virgin Island, angay unta nga gibantayan kini sa lungsod sa Panglao. Giorganisa­r ang vendors, di lang ang naa sa isla, kon di ang naa sa mainland sa lungsod labina kon ang mga kustomer niini may kalabutan sa turismo.

Bansayon ug organisaho­n ang tanang mga tawo nga nalambigit usab sa samang industriya, sama sa mga guide ug uban pa aron di magkayamuk­at ang agi. Kinahangla­n kanunay nagpatigba­baw ang LGU sa tanang mga lakang bisan sa mga pribadong establisem­ento. Kay usa ra gud ka sayop, bisan usa o pipila lang ang nakahimo, maangin na man ang tanan.

Newspapers in Cebuano

Newspapers from Philippines