Ang inahan ni Amparo
Mi-teks si Amparo sa iyang inahan nga si Charito: “Ma, gisugo ko ni Papa nga ipakuha ka. Papaulion ka niya. Di na siya katuo nga seminar imong gianha sa Negros. Usa ka bulan na ka nga wa mouli.” Nagsakay si Amparo sa traysikol karong buntaga aron moadto sa pantalan para Dumaguete. Dugay na siyang nakasabot nga ang iyang inahan dunay laing lalaki. Singkuwenta na kapin ang edad sa iyang mama, apan bigsa pa kaayo. Wa na kiniy gugma sa iyang Papa Zoilo. Di lang si Amparo gusto nga magubot ang ilang pamilya, maong wa lang siya mosumbong sa iyang papa.
“Sultihi lang si Papa mo nga di na ko mopauli. Duna koy kaipong laing lalaki,” tubag-teks ni mama niya nga nabasa ni Amparo sa iyang selpon. Gihilasan gyud siya sa iyang mama. Mibawos pagteks si Amparo, “Ikaw ang angay mosulti ana kang papa. Gawas pa, kaslunon ko sunod bulan. Dapat ipaso una ko ninyo paingon sa altar. Kon makigbuwag ka ni papa, unya na, inigka human sa akong kasal.”
Ang kabuotan sa iyang papa giabusohan na sa iyang mama. Bisag traysikol drayber lang ang iyang amahan haruhay man ilang panimuyo. Way bisyo ang iyang papa, nakapahuman og kurso sa kolehiyo nilang duha ka managsuon. Iyang Manoy Leo nakahuman sa Accountancy. Ug siya (Amparo) nakatapos sa BS-Psychology. Ang iyang Mama Charito kawani sa opisina sa Tasador sa ilang lungsod sa Samboan ug nipasangil lang sa iyang papa nga motambong og seminar sa Dumaguete. Apan ang tinuod, nag-payl og ‘indefinite leave’ sa ilang opisina.
Kuragan gyud ang mama ni Amparo. Ikaduha na kini niyang kuyog og laing lalaki. Sa unang higayon gipasaylo kini sa iyang papa. Apan karon nabalaka si Amparo nga basig hidapatan na sa iyang papa ang iyang mama. Lima ka tuig na ang nakalabay napusilan ang iyang maguwang ug namatay. Way nadakpang suspek. Way nakasuhan. Nagtuo si Amparo nga kastigo kadto sa Diyos sa iyang mama nga nagluib sa iyang papa. May nailhan siyang mga lalaking himabaye nga namatyan og mga anak. Sa ilang pamilya ang iyang mama maoy palikera.
Nabugto ang huna-huna ni Amparo dihang mitunog ang iyang selpon. Incoming message gikan sa iyang mama: “Sige. Kuhaa ko diri. Unya inigpauli nato, sultii lang si papa nimo nga mga kauban nako sa opisina ang akong kuyog. Nag-sight seeing lang mi.”
“Kaluoy ni papa!” tuaw ni Amparo. Di lang siya gusto nga makasaksi unya kon magaway ang iyang ginikanan. Matod pa sa iyang mama nga gibuya lamang sila si Papa niya kaniadto sa ilang mga ginikanan ug nakasal. Misantop sa hunahuna ni Amparo nga bisan pa og gibuya si Mama niya kang Papa niya, kasado sila ug may gipanumpaan atubangan sa pari.
Unya, hilom nga nag-ampo si Amparo nga unta dili siya maliwat sa iyang mama. Hinuon, wagas man ang iyang paghigugma sa lalaki nga iyang pamanhunon. (KATAPUSAN)