Pag-abot ni Clarkson malangan

Gipaabot nga malangan ang pag-abot ni Utah Jazz Fil-Am star Jordan Clarkson dinhi sa Pilipinas aron moapil sa training sa Gilas Pilipinas, nga adunay dagkong mga tahas nga sagubangunon sa umaabot.

Sa sayo pa, nihatag og kaseguroan ang Samahang Basketbol ng Pilipinas (SBP) nga moabot sa nasod ang kanhi Sixth Man of of the Year awardee sa National Basketball Association (NBA) karong Agusto 15, 2022.

Apan gibutyag ni Gilas coach Chot Reyes nga posibleng malangan kini og pipila ka mga adlaw gumikan sa mga kakulian nga nitumaw.

“Wala pa, it’s still being worked on,” matod ni Reyes sa interbyu sa GMA News Online.

Ang Gilas makigharong sa Lebanon karong Agusto 25, 2022 dayon batok sa Saudi Arabia karong Agusto 29, 2022 alang sa fourth window sa World Cup Asian Qualifiers.