MAGNOLIA CHICKEN GIKITKIT SA TROPA
Gipangkitkit sa Talk N’ Text (TNT) Tropang Giga ang Magnolia Chicken Timplados Hotshots, 108-96, sa premirong duwa kagahapon, Agusto 3, 2022, sa pagsugod sa ilang semi-finals best-of-seven series sa Philippine Basketball Association (PBA) Philippine Cup sa Smart Araneta Coliseum.
Ang kombati dakong sukwahi sa nahitabo sa premirong panagharong sa duha ka mga kampo niadtong Hunyo 5, 2022 diin munasginhawang ningdaog ang Tropang Giga, 78-72. Ning higayuna, ang Tropang Giga sayong ningratsada ug niposte kini’g 28-19 nga labaw human sa 1st quarter sa pagpangulo ni Mickey Williams.
Nagpadayon ang kainit ni Williams hangtod nga nainat niya ang labaw sa Tropang Giga, 54-32, sa halftime.
Pagsugod sa 3rd quarter, nibahar og gamay ang duwa ni Williams apan ang Sugboanong si Roger Pogoy na sab ang nanginit aron giyahan ang timon sa Tropang Giga.
Naposte sa Tropang Giga ang labing dako nilang labaw nga niabot og 24 ka mga puntos, 84-60, sa hinapos nga bahin sa 3rd quarter.
Ning-aksyon paggukod ang Hosthots ug napahakan nila’g dako ang labaw sa Tropang Giga, 97-84, sa hinapos nga bahin sa 4th quarter. Apan didto ra kutob ang pagpanghulga sa Hotshots.
Gipangulohan ni Williams ang Tropang Giga pinaagi sa iyang 26 puntos, nidugang og 23 puntos si Pogoy samtang niamot og 18 puntos si Glen Khubontin.
Ang Hotshots gipangulohan ni Calvin Abueva pinaagi sa iyang 18 puntos samtang ningtunol og 14 puntos matag usa sila si Ian Sangalang, Jio Jalalon ug Aris Dionisio.
Ning pagsuwat, padayon pang nagsangka ang San Miguel Beermen ug Meralco Bolts sa Game 1 sa kaugalingon nilang semi-finals series.