Gatusan ka enforcers ipakatap sa Cebu City, Lapu sa Ironman
Ang Cebu City Transportation Office (CCTO) mopakatap og 108 ka mga personnel aron mangulo sa trapiko atol sa Ironman 70.3 Philippines karong Dominggo, Agusto 4, 2022.
Si CCTO executive director Paul Gotiong niingon sa SunStar Cebu sa Huwebes, Agusto 4, 2022, nga ang mga traffic personnel ipakatap sa rota sa bike race sa Cebu South Coastal Road (CSCR).
Ipatuman usab ang road closure ug diversions gikan sa alas 5:00 sa buntag hangtod nga ang katapusang partisipante sa bike leg makahuman sa lumba.
Matud ni Gotiong nga kinahanglang ablihan ang mga apektadong karsada mga alas 12:00 ngadto sa ala 1:00 sa hapon.
Ang tibuok northbound ug southbound lane sa CSCR sirad-an sa tanang mga sakyanan. Ang mga motorista nga mopaingon sa amihanan kinahanglang moagi sa Laray Road.
Samtang, ang tanang sakyanan gikan sa Cebu City nga mopaingon sa Nustar Resort and Casino, Il Corso, ug City di Mare mahimong moagi sa F. Vestil Road ug moliko sa tuo paingon sa Bagsakan o Service Road.
LAPU-LAPU
Di mominos 126 ka traffic personnel gikan sa City Traffic Management System (CTMS) sa dakbayan sa Lapu-Lapu ang gikatakdang ipakatap sa mga karsada atol sa Ironman.
Si CTMS head Mario Napuli nitug-an sa SunStar Cebu sa Huwebes, Agusto 4, 2022, nga ang mga traffic personnel ipakatap sa nagkalainlaing lugar sa dakbayan nga maapektuhan sa mga pagsira sa dalan atol sa triathlon event.
Matod ni Napuli nga walay tino nga re-routing karong Domingo, ug midugang nga ang mga pagsira sa karsada mahitabo sa Punta Engaño paingon sa Mactan Junction, paingon sa Marigondon, paingon sa Subabasbas, diin walay makaagi gikan sa alas 4 sa buntag hangtod sa alas 2 sa hapon.
Ang unang taytayan ug ikaduhang taytayan, matod ni Napuli, bukas gihapon sa tibuok adlaw. Hinuon, gitambagan sa pangulo sa CTMS ang publiko nga likayan ang pagbiyahe sa mga apektadong lugar. /