‘Duwa’ alang sa kabatan-unan

Nakigtambayayong ang Mandaue Chamber of Commerce and Industry (MCCI) sa Happy Alchemy, Arts Council of Cebu Foundation, Inc., ug uban pa gikan sa pribadong sektor sa paglusad sa labing una niining children’s festival nga gitulohan og “Duwa”.

Ang kalihukan tipik sa kasaulogan sa Mandaue business month ning buwan sa Agusto, 2022.

Si MCCI trustee Mark Anthony Ynoc, kinsa maoy tsirman sa Mandaue business month celebration ning tuiga, mibutyag atol sa usa ka press conference niadtong Agusto 3, 2022 nga sunodsunod nga mga kalihukan ang ilang ipahigayon.

Gipasabot ni Inoc nga ilang gipasiugdahan ang Duwa aron hatagan og kahigayunan ang kabatan-unan nga makalingawlingaw sa gawas sa ilang balay nga taodtaod sab wala nasinati tungod sa pandemya.

Pinaagi sab niini, ang kabatan-unan mahilikay sa kanunay nga paggamit og gadgets, asoy ni Inoc.

Ang Duwa ilusad sa duha ka managlahing mga semana, karong Agusto 13-14 ug Agusto 20-21 sa Oakridge Business Park sa Banilad.

Apil sa Duwa ang workshops, musical storytelling, caravans, ug ang giatangan nga naandang mga duwa sa Pinoy kaniadto nga mao ang tubig-tubig, buwan-buwan, jackstone, takyan, bato-lata, ug uban pa.

Ang mga interesado sa Duwa mahimong makaparehistro sa website cebuduwafesitval.com.