BEERMEN, TROPA 2-0 ANG TUYO
Parehong mosuway pag-ugbok og laing dominasyon ang San Miguel Beermen ug TNT Tropang Giga sa ilang pagpakigbatok og balik sa ilang tagasa-tagsa ka kontra karong adlawa, Agusto 5, 2022, sa Game 2 sa semi-finals bestof-seven series sa 2022 Philippine Basketball Association (PBA) Philippine Cup sa Smart Araneta Coliseum.
Ang Beermen makigsangka sa Meralco Bolts sa premirong duwa karong alas 3:00 sa hapon samtang ang Tropang Giga makigharong sa Magnolia Chicken Timplados sa main game karong alas 6:00 sa gabii.
Sa Game 1, gipanglampornas sa Beermen ang Bolts, 12197, ug mao sab kini ang gibuhat sa Tropang Giga ngadto sa Hotshots, 108-96.
Taliwala sa 24 ka mga puntos nilang kadaugan sa Game 1, si Beermen coach Leo Austria niangkon nga aduna siya’y kabalaka hilabi na kon matamnan og kumpiyansa ang iyang ginsakupan.
“Delikado baka mag-relax. I-a-address ko yan sa kanila. This is just one game of a long series. We’ll try our best talagang gawin ang game plan,” pasabot ni Austria nga napatik sa www.pba.ph.
Giklaro ni Austria nga nasayod siya sa kalibre sa Bolts ug gipangandaman na niya ang adjustments nga pagahimuon niini.
“They want to run, they play suffocating defense. Defensive team sila, offensive team kami. May contrast, but we have to improve on our defense, and that would be the key,” dugang ni Austria.
Mao sab kini ang mentalidad sa Tropang Giga sa ilang pagpakigparang sa Hosthots.
Sa Game 1, ningdomainar og sayo ang Tropang Giga ug nalubong nila og 24 puntos ang Hotshots sa 3rd quarter.
Apan wala dayon miisa sa ilang puting bandera ang Hotshots ug ning-aksyon pa kini paggukod sa 4th quarter apan wala lang nakalahutay.
Alang kang Hotshots coach Chito Victolero, kinahanglang palihukon nila ang ilang gihuptang alas nga mao ang ilang depensa aron mabawsan ang Tropang Giga.