Best booth sa Tabo sa Kapitolyo hukman karon

Gilauman ang pagpasidungog sa mga mananaog isip best booth sa Kagamhanan sa Probinsya sa Sugbo subay sa pagpahigayon sa usa ka semanang Tabo sa Kapitolyo.

Karong adlawa, Agusto 6, saulogon sa Probinsiya sa Sugbo ang ika-453 nga anibersaryo niini sukad matukod isip lalawigan.

Si Christine Brillo, officer in charge sa Agri-Trade Fare, nagkanayon nga sa nagkaduol nga adlaw sa pagtapos sa kalihukan, pipila na usab sa mga booth sa nagkadaiyang lokalidad sa probinsya ang nanirado na.

“Sa makita nato nga uban unfortunately uban nga LGUs, nahurot ilang mga baligya, wala nay mabaligya sa ilang booth so nag una lang una sila og sira kay wala na sad silay ika reinforce,” matod ni Brillo sa Agusto 4, 2022.

Giisip kini sa kagamhanan nga dako og ikatabang sa mga lungsoranon nga makaangkon og mas dako nga kita ug makapasundayag sa ilang mga maanindot nga ani ug ginama nga produkto.

Sama na lang sa mga utanon, seafoods, suka, chili oil, goat’s milk, avocado shake, salvaro, pintos, ampaw, rosquillos, duwaw, buwad, chicharon ug uban pang mga lagutmon.

Gawas sa mga pagkaon, aduna usa’y mapalit nga mga tanom, herbs, buwak ingon man mga handicrafts. Pipila sa mga Sugboanon ug mga bisita ang nagtinguha usab nga malugwayan pa ang samang kalihukan.

Ang Tabo sa Kapitolyo gilauman nga motapos na sa adlaw sa selebrasyon pagkalalawigan sa Sugbo.

Laing kalihukan nga atangan sa mga Sugboanon ug mga bisita mao ang Pasigarbo sa Sugbo nga engrandeng selebrasyon sa katapusang semana sa Agusto.

/ AMPER CAMPAÑA BALIGYA: Nagkalainlaing produkto gikan sa kalungsoran sa lalawigan sa Sugbo ang gibaligya sa Tabo sa Kapitolyo nga giablihan niadtong Lunes, Agusto 1,2022, isip kabahin sa 453rd founding anniversary sa lalawigan.