Nag-jogging sa CCSC gikawatan

Bag nga dunay sulod nga kwarta ug cellular phone nga gibilin lang sa kilid sa oval sa Cebu City Sports Center (CCSC) samtang nag jogging ang mga biktima, gidala sa wala pa mailhing kawatan.

Matod sa biktima nga si Cedric Cantillas nga nisulod sila sa CCSC sa alas 4:00 sa hapon sa Miyerkules, Agusto 3, 2022, uban sa iyang higala nga si Dan Valdez Bombita.

Ilang gibutang sa kilid sa railing sa oval ang ilang bag, apan sa ilang pag-undang na sa pagdagan ug nibalik sa dapit diin nila gibilin ang ilang bag, nakurat na lang sila nga nawagtang na kini.

Nadala sa kawatan ang P3,400 nga alang unta kadto sa pagpatambal sa iyang higala nga adunay cancer samtang nadala usab ang cellular phone ni Bombita nga mobalor og P6,400.

Dali sila nga nagpatabang sa mga gwardya sa sports center apan wala na nila kini maabti pa nga tungod niini, ila na lang kini nga gisubay sa kuha sa closed circuit television (CCTV).

Ilang nakita ang usa ka lalaki nga naka shorts ug naka polo shirt nga yanong nipunit sa ilang mga butang nga daw siya ang nakapanag-iya.

Dunay mga tawo nga nakakita apan nagtuo kini nga ang kawatan ang tag-iya niini ug midali kini sa pag gawas.