P649M na ang danyos sa mga sunog sa Central Visayas sa 2022

Ang mga sunog sa Central Visayas nidanyos na og sobra sa tunga sa bilyon ka pesos sa unang unom ka mga buwan sa 2022.

Mokabat na sa P649,806,783 milyones ang danyos nga namugna sa mga sunog.

Ang kadaut sa mga sunog sa dakbayan sa Sugbo mao ang labing dako, diin nikabat sa P284 milyunes kapin ang danyos, ang record sa Bureau of Fire Protection (BFP) 7 nagpakita.

Gisundan kini sa lalawigan sa Sugbo nga dunay P281 milyunes kapin nga danyos.

Naa sa ikatulo mao ang Bohol nga nitala og P41 milyunes kapin.

Nagsunod mao ang P26 milyunes sa dakbayan sa LapuLapu samtang ang dakbayan sa Mandaue duna lay danyos nga P6 milyunes kapin.

Ang lalawigan sa Siquijor maoy dunay labing gamay nga natala nga naa lang sa P246,000.

Kini nga danyos nagagikan sa kinatibuk-ang 514 ka mga sunog nga girespondihan sa BFP sulod sa unom ka mga buwan.

Matod ni BFP 7 chief Fire Supt. Fritzie Manatad nga ang danyos sa sunog sa unang unom ka mga buwan sa 2022 dako kaayo kon itandi sa 2021 nga duna lay P198,819,562 nga danyos sa samang mga buwan.

Gipasabot ni Manatad nga sa kinatibuk-ang mga sunog nga gipangrespondehan sa BFP 7, kasagaran sa mga hinungdan mao ang “electrical ignition caused by loosed connection,” napasagdahan nga gas, LPG tanks ug stove.

Ang BFP kanunay nga nagpahimangno sa publiko sa pag igmat kanunay aron mahalayo sa sunog.