Presyo sa lana hayan mo-rollback og P2
Ang presyo sa lana gipaabot nga mous-os og P2 matag litro sugod sa Martes, Agusto 9, 2022.
Sa forecast sa produktong petrolyo alang sa Agusto 9 hangtod 15, ang Unioil Philippines niingon nga ang presyo sa petrolyo mahimong moubos sa P2.20 matag litro.
Sa diesel, gipaabot nga mous-os ang presyo sa P2 ngadto sa P2.20 matag litro.
Ang gasolina nakita usab nga mous-os sa presyo nga P1.90 ngadto sa P2.10 matag litro.
Ang presyo sa gasolina niusbaw sa miaging semana og P0.75 matag litro, samtang ang presyo sa diesel ug kerosine mikunhod og P0.60 ug P0.75.
Ang mga eksperto sa industriya nag-ingon nga ang nagkalapad nga kabalaka bahin sa economic recession sa kalibutan maoy nag-aghat sa dugang nga pagkunhod sa presyo sa lana, tungod sa pagkunhod usab sa panginahanglan niini.
Ikalima na kini nga rollback sukad niadtong Hulyo 5, 2022.
Sukad sa unang rollback niadtong Hulyo, nag-averaga na og P15 ang pag-us-us sa diesel samtang P14 usab ang pagminos sa presyo sa gasolina.
Dako na kining pagluag sa gasto sa mga motorista, labina sa public transport industry nga nag-antos sa kanunay nga pagsaka sa presyo sa lana sukad niadtong Enero ning tuiga, nga nag-average na og P40 ang umento.