NATANGGONG SA ROLLER COASTER

Imbes malingaw, daghang mga tawo nga ningsakay sa roller coaster sa Parque de Atracciones sa Madrid, Spain ang natanggong mga 160 ka mga tiil ibabaw sa nag malfunction nga ride.

Daling nag-viral karon ang video nga gi-upload sa social media nga nipakita sa panghitabo atol sa insidente.

Nahitabo kini mga alas 9 sa gabii niadtong Miyerkules sa dihang nisakay sa “Abismo” ride ang mga thrill-seekers sud sa theme park, base sa taho sa Spanish News Today.

Gihulagway nga usa sa mga espektakular nga roller coaster sa kalibutan, ang Abismo adunay kapaspason nga di mominos sa 105 kph.

Nahimong horror ang espektakulo niadtong Miyerkules sa dihang nakasinati kini ug technical failure.

Ang nakapait tungod kay init kaayo sa maong dakbayan niadtong higayuna diin ang kainit moabot ngadto sa 37 degrees Celsius. Natanggong ang mga pasahero sa ride og kapin sa usa ka oras usa pa sila na-rescue.

/ INDIATIMES ■ TANGGONG: Kapin sa usa ka oras ang pagkatanggong niining mga nisakay sa roller coaster sa usa ka theme park sa Madrid, Spain niadtong Miyerkules human makasinati og technical failure ang maong ride. Ang nakapait tungod kay init niadtong higayuna ug na-rescue ang mga pasahero human sa kapin usa ka oras.