MAGNOLIA MITABLA SA SERIES

Nagkombuya silang Mark Barroca ug Ian Sangalang aron timonan ang Magnolia Chicken Timplados 92-88 nga kadaugan batok sa Talk ‘N Text aron tablahon ang 2022 PBA Philippine Cup semifinals series 1-1 didto sa Smart-Araneta Coliseum.

Si Barroca nipabuto og 16 gikan sa iyang 22 puntos sa second half samtang si Sangalang nipasulod sa duha ka crucial nga tira atol sa suway nga pag-rally sa Tropang Giga pinangulohan ni Mikey Williams.

Napasulod ni Barroca ang jumper nga nag-inat sa labaw 88-81 human si Williams nagbangis sa fourth quarter nga niiskor og 25 gikan sa iyang 28 puntos.

“Ang sabi ko lang naman sa kanila is we have to go back to our defensive mentality,” padayag ni coach Chito Victolero

“We were limiting to under 84 points ‘yung mga kalaban namin but the last time, they scored 108 points. Malayo sa average namin. But now, we did a good job especially in the first half,” dugang ni Victolero. Ang Magnolia gipukan sa TNT sa game 1, 108-96 ug kini maoy magsilbing paninawos sa team.

Sa laing semifinal game, ang Meralco Bolts nitabla sa ilang series batok sa San Miguel 1-1 human ilang gipukan ang team ni June Mar Fajardo 99-88 sa game two.

Ang nagkontra sa duha ka semis pulos mga sakop sa SMC Group of companies ug PLDT Group of companies nga maoy karibal sa PBA ug sigurado na nga sila gihapon ang mag-abot sa finals.

Si Coach Normal Black kinsa mao pay pagbalik sa team human siya nilarga sa Amerika gumikan sa pagkamatay sa iyang mama, gisugat og kadaugan.

Siya nagpasalamat kang Assistant Coach Luigi Trilli kinsa maoy nitimon sa Bolts sa eliminations hangtod sa quarterfinals.

/ SPIN.PH ■ LAY-UP: Si Ian Sangalang sa Magnolia Chicken Timplados mi lay-up samtang si Poy Erram sa Tropang Giga misuway sa pagdepensa ning higayuna sa panagtigi sa duha ka teams sa semifinals sa 2022 PBA Philippine Cup semifinals series sa Biyernes sa gabii sa Smart-Araneta Coliseum.