Asturias mi-trapped sa Ormoc; paglaom sa semis mibukhad

Mihayag ang paglaom sa Asturias Corn Ranchers nga makalangkat og lingkuran sa sunod round sa dihang saktong dominasyon ang gilabok niini batok sa OCCI Ormoc Sheermasters, 7866, sa nagpadayon nga Pilipinas Super League (PSL) 21-under nga gipahigayon sa Sports Complex sa lungsod sa Cordova, Cebu.

Ang trapping defense gikan sa sinugdanan hangtod sa katapusang hugna sa panagsangka maoy nahimong mahait nga hinagiban nga gipahimuslan sa Corn Ranchers aron mahagdaw ang ilang ikaduhang sunodsunod nga kadaugan sulod sa lima ka mga duwa, 2-3.

“Nindot ang gipakita sa mga bata kay milahutay gyud ang ilang hangin hangtod sa katapusan. Sa miagi gud natong mga duwa, maayo silang makasugod, pero mobahar sa hinapos nga bahin. Bati atong ending. Karon mi-improved na,” matod sa Asturias headcoach ug kanhi PBA star Junthy Valenzuela.

Human sa 42-32 nga labaw sa halftime, ang Asturias nipaburot sa ilang bintaha, 53-38, kuwatro minutos ang nahabilin sa third quarter.

Ang three-point play ni Den Rick Orgong ug ang upat ka free throws ni Aero Aparacio maoy mipasamot og bingat sa labaw, 62-38, nga mao usab ang misira sa ikatulong quarter.

Pipila ka mga higayon nga misuway sa pagpahagsa og rally ang Sheermasters ubos sa panaghugpong nila ni Dean Barrera ug sa bigman nga si Ray Charles Libatog, apan ang pagpakunhod sa labaw ngadto sa 10 puntos, mao ray pinakasikit nga ilang nahimo.

Ang balansing ataki sa Corn Ranchers ang naghatag og labad sa ulo sa Ormocanons kansang coach napahamtangan og technical foul gumikan sa pagsigi og reklamo sa mga tawag sa referees.

Halos tanang Ranchers ang nakatampo sa opensa pinangulohan nila ni AJ Sacayan, Juhan Torion ug Aparicio, kinsa pulos mitali og tag 12 puntos.

Si Orgong nga may nuebe puntos, walo ka rebounds ug duha ka assists, sa ikaduhang higayon, mao na usab ang nahimong best player of the game.

Sa habig sa Ormoc, si Kobe Christian Palencia mitali og 17 puntos nga may tulo ka tres ug 12 puntos usab ang nahimo ni Barrera.

Aron pagwahing sa dalan paingon sa sunod round, kinahanglan dag-on sa Asturias ang katapusang upat ka mga duwa niini nga naglakip sa Lapu-Lapu City, Cagayan de Oro ug Bukidnon./