SBP naghuwat ni Kai Sotto

Ang Samahan ng Basketball ng Pilipinas (SBP) naghuwat sa desisyon sa higanteng si Kai Sotto nga mo-commit sa Gilas Pilipinas alang sa Fiba World Cup sa Agusto 2023.

Ang 7-foot-2 nga magduduwa sa Australian National Basketball League wala pa makahatag og komunikasyon sa iyang intensyon pag-apil sa grupo nga giumol ni SBP President Al Panlilio.

Matod pa sa opisyal sa SBP nga kinahanglan magkahiusa para sa nasod ug mapakita ang abilidad mismo sa tugkaran sanglit katapusang naka-host ang Pilipinas sa Fiba niadto pang 1978.

Gihimong sanglitanan ni Panlililo ang sakripisyo sa Philippine Basketball Association, National Collegiate Athletic Association ug UAAP kinsa iyang gihulagway nga niantos alang sa nasod.

Ang Fil-am nga si Jordan Clarkson sa Utah Jazz kinsa maoy 6th man of the year awardee duha na ka season ang nakalabay nipadayag na sa iyang gusto nga makaduwa para sa Pilipinas.

Karong buwana, si Clarkson gikatakdang moduwa sa qualifying window para iyang mahimamat ang mga magduduwa sa Gilas diin ang uban iya nang nakauban sa una niyang duwa alang sa Philippine flag pipila na ka tuig ang nakalabay.

Ang Gilas Pool langkuban sa 24 ka mga players gikan sa PBA, UAAP, NCAA ug mga overseas players nga pagatimonan ni coach Chot Reyes ug Tim Cone sa sideline para sa sunod tuig nga torneyo.

Pipila sa mga PBA players nga apil sa pool silang sixtime MVP June Mar Fajardo , reigning MVP Scottie Thompson, CJ Perez, Calvin Oftana, Chris Newsome, Jaime Malonzo ug Troy Rosario.