137 ka pamilya sa Barili apektado sa baha

Moabot sa 137 ka mga pamilya nga nilangkob sa 624 ka mga indibiduwal nga apektado sa pagbaha sa lima ka mga barangay sa lungsod sa Barili sa habagatang Sugbo, ang nakadawat og tabang gikan sa lokal nga kagamhanan subay sa sagunson nga pag-uwan.

Nasuta sa lokal nga kagamhanan sa lungsod sa Barili nga naapektohan ang mga barangay tungod sa pag-awas sa tubig sa sapa nga anaa duol sa dike.

Niresulta kini sa pagsaka sa tubig baha sa silingang nga barangay, mga imprastraktura ug kabtangan sa Bagakay, Dakit, Poblacion, Gunting ug Campangga.

Sa nasayran, nahugno usab ang usa ka footbridge nga nagsumpay sa Barangay Sta. Ana ug Poblacion.

Gibanabana ang danyos niini nga moabot og P1 milyon.

Upat usab ka mga panimalay sa Barangay Bagakay ug Dakit ang naguba.

Nahupay ang kaguol sa kagamhanan human wala hinuoy natala nga naangol o nakalas sa hitabo.

Subay niini, gisaad sa kagamhanan ang paghatag og ayuda sa tanang apektadong pamilya.

Sa giluwatang pamahayag sa local government unit (LGU) sa Barili, gisugdan na sa munisipyo ang pag apud-apod sa mga ayuda sama sa pagkaon, bitamina ug uban pang tambal alang sa matag pamilya pagpanalipod batok sa sakit.

Si Barili Mayor, Pablo John “John-John” Garcia IV maoy nangunay sa pagsusi sa danyos sa mga nabahaan ug ang pagsusi sa mga panimalay nga nanginahanglan og abag sa kagamhanan.

Si Cebu 3rd District Rep. Pablo John ‘PJ’ Garcia nipahibalo usab nga moabag kini sa pagdugang og food packs ug medisina alang sa mga apektadong pamilya.

“Personnel of Barili’s Disaster Risk Reduction and Management Office are on standby as intense rain continues to threaten the town and the whole province of Cebu,” sigon sa pamahayag sa LGU.

Sukad sa Agusto 3 hangtod ning pagsuwat, nasinati sa Sugbo ang sunodsunod nga pag-uwan hinungdan sa nasinating pagbaha sa pipila ka bahin sa lalawigan lakip na sa mga dakbayan sa Sugbo, Mandaue ug Lapu-Lapu.

Una nang gipahibawo sa weather advisory sa Philippine Atmospheric Geophysical and Astronomical Services Administration (Pagasa) Mactan nga ang sunod-sunod nga paguwan nasinati subay sa kombinasyon ug epekto sa duha ka major weather systems diin usa ka low-pressure area ang namugna sulod sa Philippine Area of Responsibility (PAR) ug ang nasinating hangin nga habagat. /