Gwen: Katungod sa matag usa kon motan-aw o dili sa "Maid in..."

Gipadayag ni Cebu Governor Gwendolyn Garcia nga dunay katungod nga mopili sa pagtan-aw ang mga Sugboanon sa salida nga “Maid in Malacañang” bisan pa man sa pagpanalipod niini sa mga madre sa Carmelite Cebu nga nahisgutan sa maong salida.

Una na nga nipadayag sa pagsuporta si Garcia sa pamahayag sa Carmelite Monastery nga mikondinar human makita ang trailer sa salida, diin sa usa ka eksena nakigdula og mahjong si kanhi Presidente Corazon ‘Cory’ C. Aquino sa tulo ka mga madre panahon sa People Power didto sa kaulohan.

“If you want to watch it, watch it. It's your choice. I trust the Cebuanos enough that they have the proper frame of mind and sense of responsibility to know what is good for them,” matod ni Garcia.

“But when the Carmelites feel that they have been unfairly presented then I would have to stand with them,” dugang niya.

Matod ni Garcia, dili pamolitika ang iyang paglaban sa Carmelite Cebu. Gani sa Agusto 2, 2022 miluwat siya og pamahayag nga nagkondinar sa mga pangdaot batok sa mga madre.

Gisaysay sa gobernador nga mahinungdanon ang Carmelites alang kaniya ug sa iyang inahan ilabi na sa panahon nga nanginahanglan siya og giya ug mga pag-ampo sa paghimo og desisyon.

“This is not a commentary on the movie. This is in support of the statement of the Carmelite..," sigon ni Garcia.

Si Garcia gidapit ni Anabelle Rama sa premier sa salida apan mibalibad kini sanglit duna kini importanteng mga lakaw sa Ormoc.